Бухоро вилоятининг Бухоро туманида фермер томонидан яратилган боғдаги ёш ниҳоллар нобуд қилиниб, ўрнига ёнғин хавфсизлиги депоси қурилгани айтилмоқда. Бу ҳақда «Дарё»га мурожаат қилган фермер Убайдулла Содиқов фермер хўжалиги учун ажратилган ердан вақтинча фойдаланиш ҳуқуқи борлигига қарамасдан, ер унинг розилигисиз олиб қўйилганини таъкидламоқда.
«Менга ижарага берилган ердан бошқа мақсадда фойдаланишса-да, бу ҳақда менга огоҳлантириш хати беришмади. Ҳатто оғзаки ҳам айтишмади», — дейди «Содиқов Убайдулла» фермер хўжалиги раҳбари Убайдулла Содиқов.
Маълум бўлишича, «Содиқов Убайдулла» фермер хўжалиги 2002 йил ташкил этилган бўлиб, туманнинг собиқ ҳокими Некмурод Пўлатовнинг қарори билан 367—368-контурдан 2 гектар ер майдони 20 йил муддатга ижарага берилган.2017 йил 17 июль куни туманнинг ўша пайтдаги ҳокими Муҳиддин Эсонов қарори билан фермер хўжалигининг «Ойбек» маҳалла Тошмачит кўчаси ҳудудидан Бухоро ҳокимлиги ҳузуридаги ягона буюртмачи инжиниринг компаниясига туман ИИБ Ёнғин хавфсизлиги бўлинмаси ёнғин хавфсизлиги депоси биносини қуриш учун 1,4 гектар ер майдони ажратилган.
Убайдулла Содиқовнинг айтишича, худди шундай ҳолат 2007 йилда ҳам рўй берган.
«2007 йил ҳам туман мутасаддилари кўрсатмаси билан фермер хўжалигимга тегишли ер майдонининг маълум бир қисмида консерва цехи қурилганди. Шунга қарамасдан еримнинг қолган қисмида боғ яратиш ва полиз экинлари етиштиришда давом этдим. Энди ёнғинга бино қуриш учун 800 дан ортиқ ниҳолимни нобуд қилишди. Фақат бино теварак-атрофида унган ниҳолларгина сақлаб қолинди», — дейди фермер.
Фермер туман ҳокимлиги ундан олиб қўйилган ер учун ўрнига бошқа ер берамиз, деб ваъда қилганини, аммо ваъда ҳалигача бажарилмаганини маълум қилмоқда.
«2002 йилдан ҳозирга қадар туманда учта ҳоким алмашди. Ҳар гал ижарага берилган ерлар ўзбошимчалик билан бошқа мақсадлар учун ўзгарди. Эътироз билдирганимда бино ва иншоотлар қуриб битказилгунга қадар ер майдони ажратиб берилиши ҳақида оғзаки ваъдалар берилади. Мурожаат қилмаган жойим қолмади. Бу тўсиқлар билан на фермер хўжалиги фаолиятини юрита олдим, на ҳаловат топдим», — дейди Убайдулла Содиқов.
Ер кодексининг 37-моддасида белгиланишича, ер участкаси ёки унинг бир қисми давлат ва жамоат эҳтиёжлари учун ер эгасининг розилиги билан ёки ердан фойдаланувчи ва ижарачи билан келишилган ҳолда тегишлича туман, шаҳар, вилоят ҳокимининг қарорига ёхуд Ўзбекистон Республикаси Вазирлар Маҳкамасининг қарорига биноан олиб қўйилади.
«Фермер ер майдонидан оқилона фойдаланмаган. Давлатга ҳеч қандай ҳосил етказиб бермаган. Бундан ташқари, ёнғин хавфсизлиги туман бўлинмаси тикланган ер майдонида ҳеч қандай ниҳоллар бўлмаган. Буни бино тиклашдан олдинги суратларда ҳам кўриш мумкин, — дейди Бухоро туман Ер ресурслари ва давлат кадастри бўлими бошлиғи Жасур Ботиров. — Қолаверса, 367—368-контурга оид маълумотлар ўрганилганда «Содиқов Убайдулла» фермер хўжалигининг мавжудлиги ҳақида қайд этилмаган. Шунингдек, фермерда туман ҳокими билан ердан 20 йил муддатга фойдаланиш ва фаолиятини юритиши ҳақида ижара шартномаси ҳам йўқ».
Фермер хўжалиги раҳбарининг онаси Меҳри Жўраевага кўра, ижарага олиш шартномаси бўлган, аммо йўқолган.
«Ҳақиқатан ҳам давлатга ҳосил етиштириб беролмаганмиз. Аммо ерга ишлов бериб, уни тиклагунимизча орадан икки йилча вақт ўтди. Кейин сабзавотлар етиштириб, боғ барпо этиш мақсадида ниҳоллар ўтқаздик. Ниҳоллар ҳали бўй чўзмай туриб, йўқ қилинди ва қурилиш ишлари бошланди. Ер майдонимиз йилдан йилга қисқариб бораверди. Тадбиркорлик турини ўзгартириш, яъни ер майдонида спорт ўйингоҳи ва боғ яратишга рухсат олиш учун югур-югурларимиз зое кетди. Охири умидни ҳам узиб қўйдик», — дейди Меҳри Жўраева.
Суриштирув давомида «Содиқов Убайдулла» фермер хўжалиги томонидан 2002 йилдан 2007 йилгача ердан фойдаланганлик бўйича ижара ҳақи ва ер солиғи мунтазам тўлаб келингани маълум бўлди.
Бухоро ҳокими ўринбосарининг жорий йил 26 мартдаги хатига асосан бино қурилган ер «Содиқов Убайдулла» фермер хўжалигига 20 йил муддатга ижарага берилгани, бироқ фермердан олиб қўйилган ер учун ўрнига мос равишда ер участкаси берилмагани маълум бўлади.
Вилоят ҳокимлигининг ёзишича, ушбу масалани кўриб чиқиш Бухоро тумани ҳокими томонидан кечиктириб келинган.
«‘Содиқов Убайдулла’ фермер хўжалигига оид барча ҳужжатлар ўрганилганда йиллар давомида ердан оқилона фойдаланмагани, ҳосилдорлик йўқлиги маълум бўлди. Ижарага олиш шартномаси ҳам мавжуд эмас. Шунга қарамай, ‘Содиқов Убайдулла’ фермер хўжалигига белгиланган тартибда туманнинг ‘Кунжиқалъа’ маҳалла фуқаролар йиғини ҳудудидан тенг миқдорда, балки ундан ҳам ортиқ ер майдони ажратиш масаласи кўриб чиқилган. Яқин орада эса захира ва ўзлаштирилмаган ер майдонлари мавжуд эмас», — дейди Бухоро тумани ҳокими Қаҳрамон Дўстов.
Аниқланишича,«Кунжиқалъа» маҳалла фуқаролар йиғини фермер яшаш манзилидан 30-35 километр узоқликда жойлашган.
«Мен йиллар давомида фермер хўжалигимга 20 йилга муддатга берилган ердан тўсиқлар сабаб фойдалана олмадим. Энди эса узоқдан ер майдони ажратилиши туман ҳокими томонидан ўйлаб топилган навбатдаги тактика холос. Мен ҳокимнинг менга атайин қасд қилиб қўяётган таклифини рад этаман ва ўз ҳақимни талаб қиламан», — дейди Убайдулла Содиқов.
«Дарё» воқеалар ривожини кузатишда давом этади.
Изоҳ (0)