Қарши туман ҳокими ва ўринбосари судда икки хил кўрсатма берди. Қай бирининг гапи ростлиги очиқ қолмоқда

Қашқадарёда кластер раҳбари ва Қарши туман ҳокимлиги ўртасидаги суд жараёни 25 май куни ўз ишини давом эттирди. Судда қатнашган туман ҳокими Мақсуда Мустафоева ўтган суд мажлисида иштирок этган ўринбосари Акром Ариповнинг кластер раҳбаридан комбайнлар таъмири учун пул сўралгани ҳақидаги гапини рад этди.

Акром Арипов жорий йил 20 май куни бўлиб ўтган суд мажлисида судья сўровига жавобан туман ҳокими билан биргаликда Sulton Тех Group кластер раҳбари Нурбек Эргашевнинг ёнига бориб, комбайнлар таъмири ва ғалла ҳосилдорлигини яхшилаш учун пул сўралганини таъкидлаганди. Ҳоким Мақсуда Мустафоева эса кластер раҳбаридан пул сўралмаганини айтди.

Судья Мақсуда Мустафоевага ўринбосарининг гапини эслатиб, ҳоким ва ўринбосари икки хил кўрсатма бераётганини, қай бирининг гапи тўғрилигини сўради.

«Унда мен йўқ эдим. Бу масалани мен ҳозир сизлардан эшитиб турибман», — деди туман ҳокими.

Қарши туман ҳокими сўзига кўра, тумандаги 560 нафар фермер жорий йил бошида кластер билан тузган шартномаси бекор бўлмаса-да, янги ташкил этилаётган кооперация билан ихтиёрий тарзда шартнома тузган. Шартнома тузмаган фермерлар 9 нафарни ташкил қилади.

Мақсуда Мустафоеванинг айтишича, Халқ депутатлари туман кенгашининг қарори билан Sulton Тех Group фаолияти тўхтатилгач, туман ҳокимлиги ва фермерлар қишлоқ хўжалиги ишларини бажаришда қийинчиликка учраган.

«Ўша кунларда Нурбек Эргашев давлат ишларини шунчалик орқага тортдики, бу кишини топиб бўлмай қолди. Чунки ўғит бу кишида, чигит бу кишида, техника бу кишида. Тракторларини ҳам топиб бўлмай қолди. Биз шунчалик азобландикки, ҳатто эсларига ҳам келмадик. Мен давлатнинг ишига халал беряпман-ку, аҳолини оч қолдиряпман-ку, деган гапни хаёлига ҳам келтирмади. Биз шунинг учун кооперация билан келишиб, ишларни бажардик. Кластер ҳайдаган ерларга ҳалиям культивация тополмаяпмиз. Фермерлар кластердан сўраб борса, ҳатто пулга ҳам техникасини бермади», — деди Мақсуда Мустафоева.

Судда сўз олган Бизнес-омбудсман вакили Шероз Шодиев кластер ўрнига ташкил этилган кооперация Халқ депутатлари туман кенгаши қарори билан ташкил этилиши қонунга зид эканлигини билдириб, кенгаш раиси бўлган ҳокимдан бу ҳолатга изоҳ сўради.

Ҳоким эса кенгаш қароридаги «ташкил қилинсин» деган сўз таклиф маъносини билдиришини айтиб, кооперация тузишга таклиф берилганини билдирди.

Бизнес-омбудсман вакили ҳокимдан судда кластер раҳбаридан комбайнлар таъмири учун пул сўраганини рад этганини эслатиб, Ўктам Барноев ҳамда вилоят ҳокими Зоир Мирзаевга ёзган хатида 5 миллиард 636 миллион сўм ҳақида сўз борганини, хатда ҳоким сифатида кластер бу пулни тўламаётганидан шикоят қилишининг сабабини сўради.

Ҳоким эса пул сўралганини яна инкор қилиб, буни ўзидан юқори турувчи мансабдорларга таклиф сифатида ёзганини айтди.

Суд 10 кунлик танаффусдан сўнг 5 июнь куни ўз ишини давом эттирадиган бўлди.