Қорақалпоғистонда 13 ёшли фарзандини алдаб, унинг ўзига айтмасдан бошқага сотаётган аёл ушланди. Бу ҳақда ИИВ ҳузуридаги Тергов департаменти хабар қилган.
Хабарга кўра, 2020 йилнинг 19 май куни 43 ёшли М.П. Беруний тумани ИИБга ариза билан мурожаат қилиб, Тўрткўл туманида яшовчи Қ. исмли аёл ўз фарзандини сотмоқчи бўлиб юрганлигини баён қилган. Аризага асосан шу куни соат 21:00 да Беруний тумани ИИБ ходимлари томонидан ўтказилган тезкор тадбирда Тўрткўл туманида жойлашган уйда ижарада яшаб келаётган 38 ёшли Қ.К. ўзининг иккинчи фарзанди — вояга етмаган 13 ёшли Д.О.ни фуқаро С.Э.га 15 минг АҚШ доллари эвазига сотаётган вақтида ушланган.
Ҳодиса содир бўлган жойдан кимёвий ишлов берилган 400 АҚШ доллари ҳамда қолган 14 600 АҚШ доллари миқдоридаги пуллар аниқланиб, ашёвий далил тариқасида ўрнатилган тартибда расмийлаштириб олинган.
Ҳолат юзасидан Тўрткўл тумани ИИБ ҳузуридаги Тергов бўлими томонидан Қ. К.га нисбатан Ўзбекистон Республикаси Жиноят кодексининг 135-моддаси 3-қисми «а» (Одам савдоси) банди билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Изоҳ (0)