Коллектив хавфсизлик шартномаси ташкилоти (ОДКБ) мамлакатлари 2021 йилда Тожикистонда йирик ҳарбий машғулотларни ўтказишни режалаштирмоқда. Машғулотлар давомида тожик-афғон чегарасидаги можароларни ҳал қилишда зарур бўладиган ҳаракатлар ишлаб чиқилади. Бу ҳақда ОДКБ бош котиби Станислав Зась маълум қилди, деб ёзмоқда «РИА Новости».
«Биз кейинги йилда ОДКБнинг коллектив кучлари билан Тожикистон ҳудудида йирик ҳарбий машғулотлар ўтказишни режалаштиряпмиз. У ерда чегараолди можароларини ҳал қилишда зарур бўладиган ҳаракатлар ишлаб чиқилади», — деди ташкилот раҳбари.
ОДКБ бош котибининг сўзларига кўра, ташкилот тожик-афғон чегарасида террорчилик гуруҳлари ва ИШИДнинг фаоллиги ошаётганини қайд этмоқда. Шу сабабли ОДКБ мазкур ҳудудда чегарани мустаҳкамлаш бўйича турли чоралар кўрмоқда.
Шу жумладан, ташкилот мазкур муаммога БМТ ва ЕХҲТ имкониятларини жалб қилиш бўйича сиёсий характердаги чора-тадбирларни амалга оширмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)