Kollektiv xavfsizlik shartnomasi tashkiloti (ODKB) mamlakatlari 2021-yilda Tojikistonda yirik harbiy mashg‘ulotlarni o‘tkazishni rejalashtirmoqda. Mashg‘ulotlar davomida tojik-afg‘on chegarasidagi mojarolarni hal qilishda zarur bo‘ladigan harakatlar ishlab chiqiladi. Bu haqda ODKB bosh kotibi Stanislav Zas ma’lum qildi, deb yozmoqda “RIA Novosti”.
“Biz keyingi yilda ODKBning kollektiv kuchlari bilan Tojikiston hududida yirik harbiy mashg‘ulotlar o‘tkazishni rejalashtiryapmiz. U yerda chegaraoldi mojarolarini hal qilishda zarur bo‘ladigan harakatlar ishlab chiqiladi”, — dedi tashkilot rahbari.
ODKB bosh kotibining so‘zlariga ko‘ra, tashkilot tojik-afg‘on chegarasida terrorchilik guruhlari va IShIDning faolligi oshayotganini qayd etmoqda. Shu sababli ODKB mazkur hududda chegarani mustahkamlash bo‘yicha turli choralar ko‘rmoqda.
Shu jumladan, tashkilot mazkur muammoga BMT va YeXHT imkoniyatlarini jalb qilish bo‘yicha siyosiy xarakterdagi chora-tadbirlarni amalga oshirmoqda.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)