Бухоро вилоятининг Қоракўл туманида жойлашган «Газлинефтқазибчиқариш» МЧЖга қарашли газ қувуридан 20 тоннадан зиёд газоконденсат хом ашёсини ўғирлаган саккиз нафар фуқаронинг ҳар бирига икки йилга озодликдан маҳрум қилиш жазоси тайинланди. Бу ҳақда «Дарё»га Жиноят ишлари бўйича Қоракўл туман суди раиси Жалол Садиров маълум қилди.
Газоконденсат хом ашёсини ўғирлаганларнинг етти нафари жиноий тил бириктирган, бир нафари эса якка ҳолда жиноят содир этган.
Маълум бўлишича, дастлабки ўғрилик Жамшид Қобилов, Элмурод Норов, Қодир Рамазонов, Саид Қаҳрамонов, Руслан Набиев, Фармон Насимов, Санжар Ғаниевлар (исм-шарифлар ўзгартирилган) томонидан 2019 йил 9 июль куни содир этилган.
Улар «Газлинефтқазибчиқариш» МЧЖга қарашли Қорақўл тумани ҳудудида жойлашган Учқур-Кулбешкак йўналишидаги газ қувурини тешиб, қувурга хомут ўрнатган. Сўнгра елим шланг улаб, маҳсулотни қувурдан 500 метр узоқликда қазилган ва сиртига селофан қоплама тўшалган ҳовузга тўккан. Ҳамда ҳар бир тоннаси 1 миллион 131 минг 690 сўм бўлган тўрт тонна газоконденсат хом ашёсини ўғирлаган.
Жиноий гуруҳ ҳаракатини икки кундан сўнг давом эттириб, тунги соат 03:00 га қадар бўлган вақт оралиғида яна худди шу манзилдан етти тоннадан ортиқ баҳоси 8 миллион 621 минг 214 сўмлик маҳсулотни ўғирлаган. Жами 12 тонна 618 килограмм бўлган 13 миллион 147 минг 974 сўмлик газоконденсат хом ашёсини ўғирлаб, масъулияти чекланган жамиятга моддий зарар келтирган.
Ўғрилар ЙПХ ходимлари томонидан тўхтатилгач, конденсатни солярка маҳсулоти дея ёлғон кўрсатма берган. Бу ҳолатни улар суд залида тан олган. Таъкидланишича, талон-торож қилинган 13 миллион 147 минг 974 сўмлик зарар тўлиқ қопланган.
Худди шундай ўғрилик Ғиждувон туманида туғилган фуқаро Барот Холов (исми шарифи ўзгартирилган) томонидан ҳам амалга оширилган. У «Ўзнефтгазқазибчиқариш» АЖга қарашли кондан ноқонуний қувур орқали 9 миллион 279 минг 858 сўмлик 8,2 тонна конденсат маҳсулотини ўғирлагани учун жавобгарликка тортилган.
Жиноят ишлари бўйича Қоракўл туман суди ҳукмига кўра, газоконденсат хом ашёсини ўғирлаган ва талон-торож қилган фуқаролар Жиноят кодекси 169-моддаси 3-қисмининг «г» банди (Ўғрилик) ва 255-2-моддаси 2-қисмининг «б» банди ( Нефть қувурларини, газ қувурларини, нефть ва газ маҳсулотлари қувурларини яроқсиз ҳолатга келтириш) билан айбланган ва ҳар бирига икки йил муддатга озодликдан маҳрум қилиш жазоси тайинланган.
Изоҳ (0)