Ўзбекистонда сайловларни ўтказиш санаси декабрь ойидан март ойига кўчирилиши мумкин

Президентнинг «Ўзбекистон миллий сайлов тизимини янада демократлаштириш чора-тадбирлари тўғрисида»ги фармони лойиҳаси эълон қилинди. Лойиҳага кўра, сайлов қонунчилигига қатор жиддий ўзгартиришларни киритиш таклиф этилмоқда.

Хусусан, фармонда суд томонидан муомалага лаёқатсиз деб топилган шахсларга сайлаш ҳуқуқини бериш режалаштирилмоқда. Суд томонидан индивидуал тартибда сайлаш ҳуқуқи чекланган ҳоллар бундан мустасно.

Бир номзод фақат битта вакиллик органига депутат этиб сайланиши мумкинлиги тўғрисидаги қоидани ўрнатиш ҳам кўзда тутилган. Бўшаган депутатлик ўринларига сайлов ўтказиш учун аниқ муддатлар белгиланади.

Сайловчилардан ярмидан кўпининг овозини олган номзоднинг сайланган деб ҳисобланиши (мутлақ кўпчилик) тўғрисидаги қоида ўрнига, сайловчиларнинг энг кўп овозини олган номзоднинг сайланган деб топилиши (нисбий кўпчилик) ҳақидаги қоидани парламент ва маҳалллий кенгашларга сайловларда жорий этиш масаласини ўрганиш белгиланмоқда.

Бундан ташқари, Ўзбекистонда муддатли сайловларни ўтказиш санаси декабрь ойидан март ойига кўчирилиши мумкин.

Парламентда ўз фракциясига эга бўлган сиёсий партияларга (камида 9 та депутатлик ўрни) сайловларда иштирок этиш учун сайловчиларнинг қўллаб-қувватловчи имзоларини (парламент сайловида 40 мингта, президентлик сайловида сайловчиларнинг 1 фоизи миқдорида) тўплаши шарт эмаслиги тўғрисидаги қоида ўрнатилиши кутилмоқда.

Парламент сайловларида мажоритар тизимдан аралаш (мажоритар пропорционал) тизимга ўтиш масаласи ҳам ўрганиб чиқилади.

Ҳозирги тартиб билан белгиланган сайловолди ташвиқоти даврида айрим чекловларни олиб ташлаш ҳам режалаштирилган. Жумладан, сайлов комиссияларининг депутатликка номзодларнинг сайловчилар билан учрашувларини ташкил этишга кўмаклашиш, учрашув жойи ва вақти ҳақида сайловчиларни олдиндан хабардор қилишга оид вазифалари бекор қилинади. Сиёсий партиялар ва номзодлар томонидан сайловчилар билан учрашувлар каби оммавий тадбирларни ўтказиш учун рухсат бериш тартиби бекор қилиниб, маҳаллий ҳокимлик идораларини олдиндан хабардор қилиш тартиби ўрнатилади.

Фармон лойиҳасининг муҳокамаси 4 июнгача давом этади.