Бразилияда COVID-19 билан касалланганлар сони бир сутка ичида 19,9 минг нафарга кўпайган ва бу эпидемия бошланганидан бери кузатилган рекорд кўрсаткич. Бразилияда коронавирус инфекцияси билан касалланганларнинг умумий сони 291 минг нафарга етган. Бу Европа касалликлар профилактикаси ва назорати маркази маълумотига кўра, АҚШ ва Россиядан кейин бутун дунёда 3-кўрсаткич, 4-ўринда Испания ва 5-ўринда Италия бормоқда.

Фото: Getty Images

Россияда касалланиш кўрсаткичи (бир суткада 8,7 минг киши касалланган) пасая бошлагани ҳисобига яқин кунларда Бразилиянинг 2-ўринга чиқиб олишини тахмин қилиш мумкин. Мамлакатда коронавирус юқтириб олганлар сони расмий маълумотларда берилаётганидан анча кўплиги айтилмоқда, қашшоқ аҳоли истиқомат қиладиган қишлоқларда вазият жуда оғир, деган бразилиялик эпидемиолог Алешандре Калаше. Мамлакатдаги 13 миллион аҳоли хароба қишлоқларда ҳаёт кечиради.

Лотин Америкаси давлатларида коронавирусга чалинганларнинг умумий сони 613 минг нафардан ошган. Бразилия ҳудудидаги мамлакатларни нафақат касалланиш, балки ўлим кўрсаткичи борасида ҳам ортда қолдирмоқда. Мамлакатда 18,8 минг нафар бемор коронавирус инфекцияси асоратлари оқибатида вафот этган — бу бутун дунёда 6-кўрсаткич. Ўлганлар сони кундан кунга ошиб бормоқда, бир сутка ичида Бразилияда 888 киши вафот этган ундан аввалги куни эса 1179 нафар бемор ҳаётдан кўз юмганди. Май ойи бошларида коронавирусдан ўлим кўрсаткичи суткасига 300 кишини ташкил қилган.

«Бу каби динамика давом этса, ўлганларнинг умумий сони 120 минг нафарга етиши мумкин», — дея тахмин қилган Калаше.

АҚШ саломатлик кўрсаткичлари ва баҳолари институти прогнозлари бўйича август бошида аҳолиси 200 миллион бўлган Бразилияда коронавирус инфекцияси оқибатида вафот этганлар сони камида 88 минг нафарга, энг ёмон сценарий бўйича эса 150 минг нафарга етиши мумкин.

Беш қадам — беш касаллик ўчоғи

Бразилия Жанубий Америкада коронавирус инфекцияси билан касалланган бемор аниқланган биринчи мамлакат (25 февраль). Шундан бери у ерда қандай чоралар кўриш муҳокамасига бағишланган баҳс-мунoзaралар давом этмоқда. Президент Жаир Болсонару кескин карантин чораларини кўриш иқтисодиётга салбий таъсир қилади деб ҳисобламоқда. Пандемиянинг дастлабки босқичларида республика етакчиси коронавирус жиддий хавф солмаётгани ҳақида гапирганди.

«Мен пичоқ билан қилинган ҳужумдан кейин омон қолдим, қандайдир шамоллашга енгилмайман», — деган 2018 йилги сайлов кампанияси вақтида ҳужумга учраган президент.

«Вирус мамлакатга кириб келган ва биз уни мардонaвор ҳолда эркаклардек кутиб олишимиз лозим», — дея қайд этган Бразилия етакчиси март ойи бошида.

Бразилия федератив республика ҳисоблангани туфайли 26 та штатдаги ҳукуматлар ҳар қайсиси турлича карантин чекловларини белгиламоқда.

Мамлакатдаги асосий касаллик ўчоқлари бешта — Сан-Паулу, Рио-де-Жанейро, Сеара, Пернамбуку ва Амазонас, экспертлар фикрича 80 фоиз ўлим ҳолатлари ушбу ҳудудларда кузатилмоқда. Таҳлилчилар Амазонасда COVID-19 билан касалланганлар ҳукумат жамоавий тарзда иммунитет ҳосил қилишга уринаётган Стокгольмдагидан 10 фоизга кўпроқ эканини қайд этган.

Сан-Паулу штатида ҳукумат бошқа давлатларда қўлланилаётган карантин чораларини жорий қилган: карантин 31 майгача узайтирилган, март ўрталаридан бери ва тахминан июлгача мактаблардаги таълим тўхтатилган, 23 апрелдан бошлаб аҳолига кўчаларда ниқоб тақиш, жамоат транспортида ҳам ниқобда юриш мажбурий тартиби эълон қилинган, карантин тартибига риоя этиш бўйич интеллектуал мониторинг тизими ишга туширилган.

Рио-де-Жанейрода ҳам бир қатор чекловлар ўрнатилган, штат марказининг айрим ҳудудларига бошқа штатлардан келган одамлар киритилмаяпти. Юзлаб уйсизларга меҳмонхоналарда яшаш учун жой берилган ва аҳолига фақат фавқулодда ҳолатларда тезкор тиббий ёрдам кўрсатилмоқда. Иқтисодий инқироз сабаб танг аҳволга келган бизнес вакилларига ҳам кўмак берилмоқда. Масалан, Риода такси ҳайдовчиларидан лицензия учун тўловлар бекор қилинган. Амазонас штати ҳукумати расмий сайтида касалхоналардаги беморлар учун жойлар сони оширилаётгани, ҳиндулар учун махсус клиника очилгани ва тиббиёт препаратлари харид қилингани ҳақида маълумот берилган. Май бошида штат пойтахти Манауснинг мэри Артур Ньето тўлиқ локдауннинг оқибатлари ёмон бўлишини таъкидлаган.

Болсонару тарафдорларини йўқотмоқда

Апрель охирида касаллик юқиши бўйича ҳолатлар ва ўлимлар сони кескин ошди, Болсонару коронавируснинг хавфли инфекция эканини тан олиб, вафот этганларнинг оила аъзоларига ҳамдардлик изҳoр қилди. Президент фуқароларни кекса кишилар, жумладан, аҳолининг кам таъминланган қисмига мансуб одамлар билан мулоқотда эҳтиёткор бўлишга чақирган.

«Мен мўъжиза яратиб эпидемияни тўхтата олмайман», — дея жавоб қилган у, чеклов меъёрларининг жуда кеч жорий қилингани юзасидан айбловларга жавобан.

Коронавирусга қарши курашда у безгакка қарши хлорохин дорисидан фойдаланишни таклиф қилган, шунингдек, Болсонару ушбу дорини ишлаб чиқаришни кенгайтириш ва уни барчага етказишни ваъда қилмоқда. Аввал АҚШ президенти Дональд Трамп ҳам COVID-19’нинг олдини олишда хлорохиннинг таъсири кучлилига ҳақида гапирганди. Жаҳон соғлиқни сақлаш ташкилоти хлорохиннинг самарадорлиги исботланмаганини қайд этган.

19 май куни Бразилиянинг коронавирус билан касалланганлар сони бўйича Британиядан ўзиб кетиб, дунёда 3-ўринга чиқиб олгани хабар қилинганди.