Қозоғистонда коронавирусга чалинганлар сони 7597 нафарга, Қирғизистонда эса 1350 кишига етди

Қозоғистонда ўтган бир сутка ичида коронавирус билан касалланиш бўйича яна 363 та ҳолат қайд этилди, деб хабар беради Tengrinews.

Шу билан бирга, Павлодар, Манғистов ва Шарқий Қозоғистон вилоятларида касалликка чалиниш бўйича бирорта ҳам ҳолат аниқланмаган. Ушбу вилоятларда 21 май ҳолатига кўра, касаллар сони қуйидагича:

• Павлодар вилояти — 176;
• Манғистов вилояти — 164;
• Шарқий Қозоғистон вилояти — 59 киши.

Бутун мамлакат бўйлаб коронавирусга чалинганлар сони 7597 кишига етди. Ҳозирга қадар 3843 нафар бемор соғайишга муваффақ бўлган, 35 киши эса вирус қурбонига айланган.Қирғизистонда 22 май ҳолатига кўра яна 37 кишида COVID-19 аниқланган. Бу ҳақда мамлакат соғлиқни сақлаш вазирлигига таяниб, «Kloop» хабар берди.

• Бишкекда — 9 та ҳолат (уларнинг 3 нафари Санкт-Петербургдан келган);
• Чуй вилоятида — Соль-Илецкдан келган 1 киши;
• Ўш вилояти — 6;
• Норин вилояти — 21.

«Бир муаммога тўхталмоқчиман. Ҳалигача 38-40 га яқин янги ҳолатлар аниқланмоқда. Айримларда касаллик белгиларсиз ўтяпти, одамлар бир-бири билан алоқа қилмоқда. Алоқаларнинг кўплигидан касалланиш ҳолатлари ортмоқда. Масалан, Норин вилоятида бир нафар ходим бошқа бир туманга иш билан борган ва кўпчилик билан алоқада бўлиб, касаллик юқтирган. Касалликка чалинганлар орасида кексалар ва болалар ҳам бор», — дейди мамлакат соғлиқни сақлаш вазири ўринбосари Нурболот Усенбаев.

Таъкидланишича, бутун мамлакат бўйлаб COVID-19 коронавирус инфекциясини 273 нафар тиббиёт ходими юқтириб олган бўлиб, ҳозирга қадар уларнинг 224 нафари даволанишга муваффақ бўлган.

Мамлакатда коронавирусга чалинганларнинг жами сони 1350 кишига етган. Ўтган бир сутка давомида 20 киши соғайган бўлиб, Қирғизистонда пандемия бошланганидан буён коронавирусдан даволанганлар сони 949 кишини ташкил этмоқда.

Тожикистонда 21 май ҳолатига кўра, коронавирус билан касалланганлар сони 210 кишига ортиб, жами касаллар сони 2350 кишига етди, деб хабар беради «РИА Новости».

Таъкидланишича, ўтган бир сутка давомида мамлакатда 3 киши вирус оқибатида вафот этган. Тожикистонда ҳозирда 3533 киши шифокорлар назорати остида қолмоқда, бир сутка ичида 1008 киши касалликдан соғайган.

Ўзбекистонда эса 22 май соат 10:00 ҳолатига кўра, коронавирус инфекцияси қайд этилганлар сони 3006 нафарни ташкил қилмоқда. Шу вақтга қадар коронавирус инфекциясига чалинган 2407 нафар фуқаро бутунлай соғайиб, даволанишда бўлган 5 нафар беморнинг аҳволи оғир.