Ўзбекистондаги умумий ўрта таълим мактабларида 2019/2020-ўқув йилини якунлаш ҳамда ўқувчиларни аттестат (шаҳодатнома) билан таъминлаш тўғрисида Халқ таълими вазирининг буйруғи эълон қилинди.
Унга кўра, битирувчиларга аттестат (шаҳодатнома ва сертификат) бланкаларига қўйиладиган якуний баҳолар жорий йилнинг 5 июнигача attestat.uzedu.uz электрон тизимига киритилади ва белгиланган тартибда расмийлаштирилади.
15 июнга қадар чоп этилган аттестатлар электрон шаклда (сканер) битирувчиларга етказилади. Тайёрланган аттестатлар, олтин ва кумуш медаллар ҳудудда эпидемиологик вазият яхшиланиб, ўқувчиларга топширилгунча таълим муассасасида хавфсизлик чораларини кўрган ҳолда сақлаб турилади.
Шунингдек, карантин чекловлари олиб ташлангандан сўнг санитария-гигиена қоидаларига риоя этган ҳолда ўқувчилар табелига ва йиллик баҳолар, IV чоракда масофавий шаклда ўтилган мавзулар синф журналига қайд этилади. 1 июнгача ўқувчилар йиллик баҳоларига мувофиқ синфдан синфга кўчирилади.
Синф журналлари, ўқувчиларнинг баҳолар табели, attestat.uzedu.uz электрон тизимига киритилган маълумотларнинг тўғрилиги ва ҳаққонийлиги учун шахсан мактаб директорлари жавобгар эканлиги белгиланди.
Аввалроқ Ўзбекистондаги мактабларда 2020 йил учун якуний имтиҳонларни ўтказиш бекор қилингани, ўқувчиларнинг йиллик баҳоларини истисно тариқасида ушбу ўқув йилининг 3 та чорак баҳолари асосида чиқарилиши хабар берилган эди.
Изоҳ (0)