Ижтимоий тармоқларда икки нафар ўсмир бир болани тиз чўктириб, уни ҳақорат қилгани ва ургани акс этган видео тарқалди. Бош прокуратура томонидан «Дарё»га маълум қилинишича, мазкур воқеа 2020 йил 25 март куни юз берган.
Мазкур ҳолат юзасидан 2020 йил 23 апрель куни Тошкент шаҳар Мирзо Улуғбек туман маъмурий судида Ўзбекистон Республикаси Маъмурий жавобгарлик тўғрисидаги кодекснинг 54-моддаси 1-қисми ва 183-моддаси асосида суд мажлиси бўлиб ўтган ва суд қарори қабул қилинган.
Дастлабки суриштирув ҳужжатларига кўра, Тошкент шаҳридаги 54-мактаб ўқувчиси, 2002 йилда туғилган Д.Х. ва унинг мактабдоши, 2003 йилда туғилган О.И. 2020 йил 25 март куни соат тахминан 15:00 да карантин қоидаларига риоя қилмаган ҳолда ҳимоя ниқобисиз Тошкент шаҳар Мирзо Улуғбек тумани Улуғбек шаҳарчаси ҳудудида жойлашган 219-мактабгача таълим муассасаси олдида вояга етмаган ақли заиф А.Ш.ни турли уятли сўзлар билан сўкиб, уриб, туртиб, унга нисбатан қўпол муносабатда бўлган. Ушбу ҳолат юзасидан олинган видео Instagram ижтимоий тармоғига жойлаштирилган.
Суд икки ўсмир томонидан Маъмурий жавобгарлик тўғрисидаги кодекснинг 54-моддаси 1-қисми (Эпидемияларга қарши кураш қоидаларини бузиш) ҳамда 183-моддасида (Майда безорилик) назарда тутилган ҳуқуқбузарликлар содир этилган деб топди.
Суд қарорига мувофиқ, Д.Х. ва О.И.нинг ҳар бирига нисбатан Маъмурий жавобгарлик тўғрисидаги кодекснинг 54-моддаси 1-қисми, 183-моддаси ва 34-моддаси (Бир неча ҳуқуқбузарликни содир этганлик учун маъмурий жазо қўлланиш)га асосан базавий ҳисоблаш миқдорининг беш баравари миқдорида, яъни 1 115 000 сўм жарима жазоси тайинланган.
Изоҳ (0)