Халқаро валюта жамғармаси раҳбари Шавкат Мирзиёевга мактуб йўллади

Халқаро валюта жамғармаси бошқарувчи директори Кристалина Георгиева Ўзбекистон Президенти Шавкат Мирзиёевга мактуб йўллади. Бу ҳақда Президент матбуот хизмати хабар берди.

Кристалина Георгиева ўз мактубида вирус тарқалишига қарши курашиш, соғлиқни сақлаш соҳасига харажатларни ошириш, аҳоли ва бизнесни қўллаб-қувватлаш борасида Ўзбекистон Президенти томондан кўрилган тезкор чора-тадбирлар инқироз таъсирини юмшатишга хизмат қилишини таъкидлаган.

ХВЖ раҳбари Ўзбекитонга тақдим этиш учун жорий ҳафтада маъқулланган имтиёзли кредит Жаҳон банки гуруҳи ва Осиё тараққиёт банкининг кўмаги билан биргаликда бугунги шароитда юзага келган молиявий эҳтиёжларни қондириш имконини беришини қайд этиб ўтган.

Пандемия шароитида Ўзбекистонда фаол ва очиқ бозор иқтисодиётини шакллантириш бўйича ўрта муддатли мақсадларга эришиш йўлидаги ислоҳотлар давом эттирилаётгани жамғарма директорини руҳлантириши билдирилган.

Шунингдек, Кристалина Георгиева кейинги йилларда Ўзбекистон ва ХВЖ ўртасида эришилган юқори даражадаги ҳамкорликка таянган ҳолда зарур маслаҳат ва техник кўмакни тақдим этиш, мутахассисларни тайёрлаш бўйича таълим дастурларини амалга ошириш ҳамда молиявий ёрдам орқали Ўзбекистонни қўллаб-қувватлашни давом эттиришга тайёр эканлигини билдирган.

Қуйида мактубнинг тўлиқ матни тақдим этилади.

Ўзбекистон Республикаси Президенти

Шавкат Мирзиёев Жаноби Олийларига

Муҳтарам Президент Жаноблари!

COVID-19 пандемиясининг салбий оқибатлари бутун дунё ҳамжамиятига таъсир қилаётган бугунги фавқулодда шароитда мен мамлакатингиздаги қийинчилик ва хатарларни енгиб ўтишда Ўзбекистон халқи билан бирдам эканимни билдирмоқчиман. Вирус тарқалишига қарши курашиш, соғлиқни сақлаш соҳасига харажатларни ошириш, аҳоли ва бизнесни қўллаб-қувватлаш борасида сиз томондан кўрилган тезкор чора-тадбирлар инқироз таъсирини юмшатишга хизмат қилади.

Халқаро валюта фондининг Ижроия кенгаши жорий ҳафтада ушбу ғоят мушкул вазиятда Ўзбекистонга молиявий кўмак тақдим этишни маъқуллаганидан мамнунман. Ушбу ёрдам Жаҳон банки гуруҳи ва Осиё тараққиёт банкининг кўмаги билан биргаликда бугунги шароитда юзага келган молиявий эҳтиёжларни қондириш имконини беради.

Бугунги кунда сизнинг бутун саъй-ҳаракатингиз, табиийки, коронавирус оқибатларини енгиб ўтишга қаратилган. Айни пайтда шунга қарамай, Ўзбекистонда фаол ва очиқ бозор иқтисодиётини шакллантириш бўйича ўрта муддатли мақсадларга эришиш йўлидаги ислоҳотларингизни давом эттираётганингиз мени руҳлантиради.

Кейинги уч йил давомида сизнинг раҳбарлигингизда Ўзбекистон миқёси кенг, шу жумладан, савдони, нарх шаклланиши ва валюта айирбошлаш курсини либераллаштириш, давлат молияси ва уни бошқаришдаги салоҳиятни мустаҳкамлаш, молия сектори ва ишбилармонлик муҳитини ислоҳ қилиш бўйича мисли кўрилмаган янгиланишларни бошлади.

Ушбу ислоҳотлар Ўзбекистоннинг минтақавий ва глобал иқтисодиётга янада интеграциялашувига, янада юксак, барқарор ва инклюзив тараққиётга эришишига хизмат қилади.

Бугунги шароитда ислоҳотларни амалга ошириш йўлида мавжуд барча хатарларга қарамай, сиз иқтисодиётни трансформация қилиш бўйича сиёсатингизни қатъий давом эттиришингизга ишонаман.

Шу муносабат билан ишонтириб айтаманки, кейинги йилларда Ўзбекистон ва ХВФ ўртасида эришилган юқори даражадаги ҳамкорликка таянган ҳолда зарур маслаҳат ва техник кўмакни тақдим этиш, мутахассисларни тайёрлаш бўйича таълим дастурларини амалга ошириш ҳамда молиявий ёрдам орқали Ўзбекистонни қўллаб-қувватлашни давом эттиришга тайёрмиз.

Мен Жаҳон банкининг ижрочи директори бўлган даврдаги ҳамкорлигимизни ва шу аснода Тошкентга ташрифимни илиқлик билан эслайман. Менинг бугунги кундаги вазифамда ҳам яқиндан ҳамкорлик қилишимизга умид қиламан.

Энг эзгу тилаклар ила,

Кристалина Георгиева, Халқаро валюта жамғармаси бошқарувчи директори

Халқаро валюта жамғармасининг Ўзбекистонга кредит ажратишга розилик бергани ҳақида 23 апрель куни бош вазир ўринбосари — иқтисодий ривожланиш ва камбағалликни қисқартириш вазири Жамшид Қўчқоров маълум қилган эди.

Кейинроқ молия вазири ўринбосари Одилбек Исоқов Халқаро валюта жамғармаси 375 миллион доллар миқдорида кредит ажратишда Ўзбекистонга қўшимча шарт қўймаслигини маълум қилганди. Кредит ажратишда ХВЖ Ўзбекистондан унинг кўмагида амалга оширилаётган ислоҳотларни давом эттиришни сўраган.