Аввалроқ Наманган вилояти Чортоқ туманидан оқиб ўтувчи каналда аёл киши оқиб кетганлиги ҳамда Бош прокуратура матбуот котиби Ҳаёт Шамсутдинов мазкур ҳолат бўйича маълумот бергани ҳақида хабар берилган эди. Ҳаёт Шамсутдиновнинг «Дарё»га маълум қилишича, аёлнинг шахси аниқланган.
Чортоқ туман ИИБ томонидан хабар берилишича, 20 май куни соат 10:30 да Чортоқ тумани «Комиллик» МФЙ, Яхши ният кўчасидан оқиб ўтган Катта Наманган каналидан тахминан 20-22 ёшли, шахси номаълум аёл кишининг жасади ташқи тан жароҳатларисиз топилган.
Олиб борилган терговга қадар текширув ҳаракатлари давомида ушбу топилган шахси номаълум аёл Чортоқ тумани, «Тенгдош» МФЙда яшаган 2000 йилда туғилган О.С. эканлиги аниқланган.
Мазкур ҳолат юзасидан воқеа жойига Чортоқ туман прокуратураси ва ИИБ ходимларидан иборат тезкор тергов гуруҳи аъзолари етиб борган.
Марҳуманинг ўлими сабабларини аниқлаш мақсадида судга оид тиббиёт экспертизаси тайинланган. Янгиқўрғон туманлараро суд тиббий экспертиза бўлимининг 2020 йил 20 майдаги дастлабки маълумотига кўра, марҳуманинг ўлимига юқори нафас йўлларининг суюқлик (сув) билан беркилиши, обтурацион асфиксия асорати, ўпка, мия шиши сабаб бўлганлиги аниқланган.
«Мазкур ҳолат юзасидан ҳозирда Чортоқ туман прокуратураси томонидан терговга қадар текширув ҳаракатлари олиб борилмоқда», — дейилади хабарда.
Изоҳ (0)