Ижтимоий тармоқларда Гулнора Каримованинг фарзандлари Ислом Каримов ва Иман Каримованинг мактублари тарқалди ва кенг муҳокама қилинди. Унда Гулнора Каримова Ucell акцияларига эгалик қилиши ва ҳозирги пайтда компания давлат томонидан эмас, бошқа мулкдорлар томонидан муваффақиятли бошқарилаётгани айтилган. Ucell мазкур иккала баёнот ҳам ҳақиқатга тўғри келмаслигини маълум қилди.
Компания баёнотида таъкидлашича, 2018 йил 5 декабрь куни Ўзбекистон Республикасининг Хусусийлаштирилган корхоналарни қўллаб-қувватлаш ва рақобатни ривожлантириш қўмитаси Швеция ҳукуматига тегишли Telia гуруҳидан Coscom устав капиталидаги 100 фоиз улуши 215 миллион долларга ва Telia гуруҳининг Coscom компаниясига 485 миллион доллар миқдорида қарз мажбуриятларини тўлаб, сотиб олган. Битим бир нечта давлатларнинг ваколатли органлари томонидан амалга оширилганда, Гулнора Каримованинг компания акцияларига алоқаси йўқлиги аниқланган.
2018 йил декабрь ойида Ўзбекистон ваколатли агентлик орқали Coscom’ни Telia компаниялар гуруҳидан сотиб олган бўлиб, унга эгалик қилишни ва бошқаришни давом эттирмоқда. Coscom’ни сотиб олиш жараёни бир қатор давлатларнинг барча зарур ҳуқуқий, молиявий ва тартибга солиш талабларига мувофиқ қатъий тартибда амалга оширилган.
«Юқоридаги хатда ягона ҳақиқат Coscom муваффақиятли бошқарилиб келинаётганлиги. Бир ярим йилдан кам вақт ичида компаниямиз телекоммуникация соҳасида илғор технологияларни ривожлантиришда ҳақиқий етакчига айланди», — дейилади баёнотда.
Эслатиб ўтамиз, 2019 йилнинг сентябрь ойида Россиянинг энг йирик алоқа операторларидан бири «Мегафон» компанияси Ўзбекистоннинг Ucell алоқа операторини сотиб олгани ҳақида ҳам хабарлар тарқалган, кейинчалик бу хабарлар асоссиз эканлиги аниқланганди.
Изоҳ (0)