Россиянинг 41 нафар фуқароси бўлган Uzbekistan Airways самолёти 19 май куни Тошкентдан Санкт-Петербургга учиб кетди. Бу ҳақда Россиянинг Тошкентдаги элчихонаси матбуот хизмати хабар берди.
Бу узоқ муддатли танаффусдан сўнг Россияга ташкиллаштирилган учинчи чартер рейс бўлди. Бундан аввал Uzbekistan Airways томонидан Ростов-Дон ва Қозонга чартер рейс амалга оширилиб, 191 нафар россиялик ватанига етказилган ва у ердаги 520 нафар ўзбекистонлик Тошкентга олиб келинганди.
Элчихона маълумотларига кўра, айни пайтга келиб чартер рейслар орқали 2,7 минг нафар россиялик ватанига қайтарилган. Март ойида «Аэрофлот» ва Uzbekistan Airways авиакомпаниялари Москва, Екатеринбург, Новосибирск ва Санкт-Петербургга чартер рейсларни амалга оширганди.
Эслатиб ўтамиз, Президент Шавкат Мирзиёев 7 май кунги видеоселекторда хориждаги ватандошлар «имкониятга қараб, барибир олиб келиниши керак»лигини айтганди. Шу муносабат билан 11 майдан 24 майига қадар Ўзбекистон фуқароларини хориждан олиб келиш бўйича 12 та чартер рейс амалга оширилиши белгиланганди, шундан 7 та рейс Россиядаги ўзбекистонликларни олиб келиш учун жалб этилади.
Чартер рейсларда энг аввал беморлар, ҳомиладор аёллар, кексалар ва ёш болалилар олиб келинади. Мазкур рейсларга чиқиш учун дипломатик ваколатхоналар ҳамда консуллик муассасаларда рўйхатдан ўтиш керак.
Ўзбекистонга қайтган барча фуқаролар 14 кундан кам бўлмаган муддатга карантин марказига жойлаштирилади.
Аввалроқ Шавкат Мирзиёев топшириғи асосида Ташқи ишлар вазирлиги тезкор штаби томонидан Россия ва Қозоғистоннинг тегишли органлари билан олиб борилган ҳамкорлик ишлари сабабли икки давлат чегарасида тўпланган фуқаролар Ўзбекистонга олиб келинадиган бўлгани ҳақида хабар берилганди.
Изоҳ (0)