Осиё тараққиёт банки Ўзбекистонга коронавирус эпидемиясига қарши курашиш учун 1,36 миллион АҚШ доллари миқдоридаги маблағ ажратилишни тасдиқлади. Бу ҳақда банк матбуот хизмати хабар берган.
Грант соғлиқни сақлаш тизими ходимлари учун шахсий ҳимоя воситалари, тиббиёт соҳасининг бошқа буюмларини харид қилишга сарфланади ва бу орқали Ўзбекистонда соҳани ривожлантириш юзасидан ишлар амалга оширилади.
Маблағлар Осиё тараққиёт банкининг COVID-19 коронавирус ва бошқа юқумли касалликларга қарши курашни минтақавий қўллаб-қувватлаш техник кўмаклашиш ресурслари ҳисобидан ажратилади ва дастлабки техник ёрдам — 200 минг АҚШ доллари март ойида Ўзбекистонда тиббиёт буюмларини харид қилиш учун ажратилган.
Осиё тараққиёт банки жорий қарз ҳисобидан 19,5 миллион долларни қайта тақсимлаб, Ўзбекистоннинг 800 та сунъий нафас олдириш аппарати харид қилишига имконият яратган.
Осиё тараққиёт банки ҳукумат ва бошқа ҳамкорлар билан Ўзбекистон соғлиқни сақлаш тизимини такомиллаштириш юзасидан ишларни давом эттиради, дейилган банк баёнотида.
Аввал ХВЖ Ўзбекистонга 375 млн доллар эквивалентидаги имтиёзли кредит ажратилишини маъқуллагани, Осиё инфратузилмавий инвестиция банки Ўзбекистонда соғлиқни сақлаш тизими ва тадбиркорликни қўллаб-қувватлашни режалаштираётгани ҳамда Жаҳон банки томонидан Марказий Осиёга ажратилган 370 млн долларнинг асосий қисми Ўзбекистонга насиб этгани ҳақида хабарлар берилган.
Изоҳ (0)