Ўзбекистонда 19 май соат 10:00 ҳолатига кўра, коронавирусга чалинганлар сони 11 кишига кўпайиб, 2802 нафарга етди. Бу ҳақда Соғлиқни сақлаш вазирлиги хабар бермоқда.
Қайд этилган янги касалланиш ҳолатларининг 10 таси хориждан келган фуқароларда (улардан етти нафари Россиядан келган, уч нафари халқаро юк ташувчи машина ҳайдовчиси) ҳамда биттаси олдиндан карантинда бўлган фуқаролар орасидан аниқланган.
Соғлиқни сақлаш вазирлигидан маълум қилишларича, ҳозирги вақтда Ўзбекистон касалхоналарида 475 нафар бемор коронавирус инфекциясидан даволанмоқда, улардан олти нафарининг аҳволи оғир.
Аввалроқ, 18 май соат 23:00 ҳолатига кўра мамлакатда коронавирус инфекциясини юқтириб олиш билан боғлиқ ҳолатлар сони 2791 тага етгани ҳақида хабар берилган эди.
Ўзбекистонда коронавирус инфекцияси илк бор қайд этилганидан буён 2314 киши соғайди, инфекция асоратлари оқибатида 13 нафар бемор вафот этган.
Изоҳ (0)