Ўзбекистонда бир ҳафта ичида содир бўлган ЙТҲларда камида 15 киши ҳалок бўлди

Ўзбекистон ИИВ ЙҲХББ ва Тергов департаменти 11—17 май оралиғида содир бўлган ва одам ўлими билан якунланган 13 та йўл-транспорт ҳодисаси ҳақида маълумот берди.

Мазкур ЙТҲларда дастлабки маълумотларга кўра, 15 киши ҳалок бўлган.

1. 11 май куни Сурхондарё вилоятининг Шўрчи туманида Lacetti қарама-қарши йўналишга чиқиб кетиб мотороллер билан тўқнашди. Оқибатда 38 ёшли мотороллер ҳайдовчиси ҳодиса жойида вафот этган.
2. 11 май куни Тошкент вилоятининг Чиноз туманида Isuzu автобуси қарама-қарши томондан келаётган транспорт воситалари ёритгичлари йўлни кўриш имкониятини камайтиргани сабабли ўзи билан бир йўналишда кетаётган велосипедчини уриб юборган. Оқибатда 33 ёшли велосипедчи воқеа жойида вафот этган.
3. 12 май куни Бухоро вилоятининг Ромитан туманида трактор тиркамаси ағдарилиб кетиши оқибатида 33, 34 ва 38 ёшли аёллар вафот этган. Бу аёллар ҳайдовчининг хотини, синглиси ва келини бўлган.
4. 12 май куни Хоразм вилоятининг Янгибозор туманида Matiz ҳайдовчиси ички йўлда ўз ҳамқишлоғи бўлган 4 ёшли болани катта тезликда уриб юборган. 4 яшар бола шифохонада вафот этган.
5. 13 май куни Андижоннинг Булоқбоши туманида «Камаз» юк машинаси йўлни белгиланмаган жойда кесиб ўтаётган велосипедчини уриб юборган. 30 ёшли велосипедчи ҳодиса жойида вафот этган.
6. 13 май куни Қашқадарё вилоятининг Касби туманида хавфли бурилишда сирпаниб кетган такси дарахтга бориб урилган. Ҳодиса оқибатида Nexia йўловчиси бўлган 57 ёшли эркак воқеа жойида вафот этган.
7. 13 май куни Хоразм вилоятининг Урганч шаҳрида Cobalt катта тезликда қарама-қарши йўлга чиқиб Spark билан тўқнашган. Таксичилик қилувчи 23 ёшли Spark ҳайдовчиси шифохонада вафот этган. Cobalt ҳайдовчиси шифохонага ётқизилган.
8. 14 май куни Қашқадарё вилоятининг Қарши туманида «заправка»дан орқаси билан чиқиб келаётган фургон йўл четида турган пиёдани кўрмай қолиб уриб юборган. 25 ёшли йигит ҳодиса жойида вафот этган. Фургон ҳайдовчиси ЙТҲ юз берган пайтда маст бўлгани аниқланди.
9. 16 май куни Сурхондарё вилоятининг Қумқўрғон туманида «Камаз» ортга бурилиб олиш мақсадида орқага ҳаракатланаётганда пиёдани уриб юборган. 65 ёшли аёл ҳодиса жойида вафот этган.
10. 16 май куни Андижон вилоятининг Балиқчи туманида катта тезликда қарама-қарши йўлга чиққан Lacetti «ВАЗ-2102» билан тўқнашган. Оқибатда 26 ёшли «Жигули» ҳайдовчиси шифохонада вафот этган. Lacetti ҳайдовчиси шифохонага ётқизилган.
11. 17 май куни тунда Навоий вилоятининг Хатирчи туманида Nexia автомобили қатнов қисмида ётган маст эркакни босиб кетган. Оқибатда 56 ёшли эркак ҳодиса жойида вафот этган.
12. 17 май куни Фарғона вилоятининг Қўштепа туманида трактор тиркамаси қаровсиз қолдирилган 3 ёшли болани босиб кетган. Оқибатда 3 ёшли бола ҳодиса жойида вафот этган.
13. 17 май куни Қашқадарё вилоятининг Чироқчи туманида аёл ҳайдовчи бошқарувидаги Matiz автомобили ағдарилиб кетган. Оқибатда машинада йўловчи сифатида кетаётган 41 ёшли аёл воқеа жойида вафот этган. Ҳайдовчи аёл ва 3 нафар вояга етмаган бола шифохонага ётқизилган.

ЙҲХББ яна 4 та ЙТҲ ҳақида маълумот берган. Уларда одам ўлими билан боғлиқ ҳолатлар кузатилмаган.

1. 11 май куни Андижон вилоятининг Хўжаобод туманида иккита Damas тўқнашиши оқибатида машиналардан бири ағдарилиб кетган. Ағдарилган Damas ҳайдовчиси шифохонага ётқизилган.
2. 13 май куни Тошкент шаҳрининг Юнусобод туманида иккита Spark тўқнашиши оқибатида машиналардан бири ағдарилиб кетган. Ҳеч ким тан жароҳати олмаган.
3. 16 май куни Наманган вилоятининг Поп туманида Isuzu юк машинаси бетон тўсиққа урилиб, ағдарилиб кетган. Ҳайдовчи ва икки йўловчи шифохонага ётқизилган.
4. 16 май куни Тошкент шаҳрининг Мирзо Улуғбек туманида бошқарув вақтида Nexia ҳайдовчиси ухлаб қолиши оқибатида машина симёғочга урилган. Бахтли тасодиф туфайли ҳайдовчи тан жароҳати олмаган.

Юқоридаги ЙТҲлар ҳақидаги хабарлар 12—18 май оралиғида берилди. Аслида юз берган ЙТҲлар ва одамлар ўлими бундан кўпроқ бўлиши мумкин. Чунки ЙҲХББ ва Тергов департаменти баъзи йўл-транспорт ҳодисалари ҳақидаги маълумотни кейинроқ эълон қилиши ҳам мумкин. Мисол учун, 1 майда Навоийда электрик йигитнинг машиналар орасида қисилиб қолиб ҳалок бўлгани ҳақида 2 ҳафтадан сўнг маълум қилинди. Сурхондарёда 3 май куни Captiva ва трактор тўқнашгани ҳақидаги хабар ЙТҲ оқибатида жабрланган 13 ёшли бола 4 кундан сўнг шифохонада вафот этгач берилган.

БМТ коронавирус пандемияси сабаб йўлларда содир бўладиган авариялар оқибатида юзага келувчи ўлим ҳолати 50-60 фоизга камайганини маълум қилган.

Солиштириш учун 15 мартда Ўзбекистонда илк коронавирус ҳолати қайд этилганидан бери ўтган икки ой ичида 13 та ўлим ҳолати қайд этилди.