Буюк Британиядаги портлардан бири сотилмай қолган ўн минглаб автомобиллар учун тураргоҳга айланди. Бу коронавирус пандемияси сабаб дунёда янги автомобилларга бўлган талабнинг камайиб кетгани билан боғлиқ. Шу сабабли автомобиль ишлаб чиқарувчилар ўз маҳсулотларини сақлашга жой қидирмоқда, деб хабар беради Motor.
Daily Mail Буюк Британиянинг шимолий қисмида жойлашган Шернесс денгиз портининг суратларини эълон қилди. Порт коронавирус пандемияси ва жорий этилган чекловлар сабаб турли маркадаги ўн минглаб автомобилларга тўлган.
Бирлашган Қироллик автомобиль ишлаб чиқарувчилари ва сотувчилари жамиятининг ҳисоб-китобларига кўра, мамлакатда янги автомобиллар савдосининг даражаси Иккинчи жаҳон урушидан кейинги (1946 йил) тарихий минимумга тушиб кетган. Айни вақтга қадар мамлакатда 871 дона автомобиль сотилган, бу ўтган йилнинг шу даврига нисбатан 97 фоизга кам демак.
Денгиз порти — Буюк Британияда бу каби тураргоҳга айлантирилган ягона ноодатий жой эмас. Сотилмай қолган автомобиллар Оксфордширдаги Ҳарбий ҳаво кучларига қарашли собиқ ҳарбий базага ҳам жойлаштирилган. База ҳудудида қолдирилган машиналарнинг жами қиймати 35 миллион фунт стерлингга тенг.
Аввалроқ март ойида бутун дунёда автомобиллар савдоси антирекорд ўрнатгани ҳақида хабар берилганди.
Изоҳ (0)