O‘zbekistonda bir hafta ichida sodir bo‘lgan YTHlarda kamida 15 kishi halok bo‘ldi

O‘zbekiston IIV YHXBB va Tergov departamenti 11—17-may oralig‘ida sodir bo‘lgan va odam o‘limi bilan yakunlangan 13 ta yo‘l-transport hodisasi haqida ma’lumot berdi.

Mazkur YTHlarda dastlabki ma’lumotlarga ko‘ra, 15 kishi halok bo‘lgan.

1. 11-may kuni Surxondaryo viloyatining Sho‘rchi tumanida Lacetti qarama-qarshi yo‘nalishga chiqib ketib motoroller bilan to‘qnashdi. Oqibatda 38 yoshli motoroller haydovchisi hodisa joyida vafot etgan.
2. 11-may kuni Toshkent viloyatining Chinoz tumanida Isuzu avtobusi qarama-qarshi tomondan kelayotgan transport vositalari yoritgichlari yo‘lni ko‘rish imkoniyatini kamaytirgani sababli o‘zi bilan bir yo‘nalishda ketayotgan velosipedchini urib yuborgan. Oqibatda 33 yoshli velosipedchi voqea joyida vafot etgan.
3. 12-may kuni Buxoro viloyatining Romitan tumanida traktor tirkamasi ag‘darilib ketishi oqibatida 33, 34 va 38 yoshli ayollar vafot etgan. Bu ayollar haydovchining xotini, singlisi va kelini bo‘lgan.
4. 12-may kuni Xorazm viloyatining Yangibozor tumanida Matiz haydovchisi ichki yo‘lda o‘z hamqishlog‘i bo‘lgan 4 yoshli bolani katta tezlikda urib yuborgan. 4 yashar bola shifoxonada vafot etgan.
5. 13-may kuni Andijonning Buloqboshi tumanida “Kamaz” yuk mashinasi yo‘lni belgilanmagan joyda kesib o‘tayotgan velosipedchini urib yuborgan. 30 yoshli velosipedchi hodisa joyida vafot etgan.
6. 13-may kuni Qashqadaryo viloyatining Kasbi tumanida xavfli burilishda sirpanib ketgan taksi daraxtga borib urilgan. Hodisa oqibatida Nexia yo‘lovchisi bo‘lgan 57 yoshli erkak voqea joyida vafot etgan.
7. 13-may kuni Xorazm viloyatining Urganch shahrida Cobalt katta tezlikda qarama-qarshi yo‘lga chiqib Spark bilan to‘qnashgan. Taksichilik qiluvchi 23 yoshli Spark haydovchisi shifoxonada vafot etgan. Cobalt haydovchisi shifoxonaga yotqizilgan.
8. 14-may kuni Qashqadaryo viloyatining Qarshi tumanida “zapravka”dan orqasi bilan chiqib kelayotgan furgon yo‘l chetida turgan piyodani ko‘rmay qolib urib yuborgan. 25 yoshli yigit hodisa joyida vafot etgan. Furgon haydovchisi YTH yuz bergan paytda mast bo‘lgani aniqlandi.
9. 16-may kuni Surxondaryo viloyatining Qumqo‘rg‘on tumanida “Kamaz” ortga burilib olish maqsadida orqaga harakatlanayotganda piyodani urib yuborgan. 65 yoshli ayol hodisa joyida vafot etgan.
10. 16-may kuni Andijon viloyatining Baliqchi tumanida katta tezlikda qarama-qarshi yo‘lga chiqqan Lacetti “VAZ-2102” bilan to‘qnashgan. Oqibatda 26 yoshli “Jiguli” haydovchisi shifoxonada vafot etgan. Lacetti haydovchisi shifoxonaga yotqizilgan.
11. 17-may kuni tunda Navoiy viloyatining Xatirchi tumanida Nexia avtomobili qatnov qismida yotgan mast erkakni bosib ketgan. Oqibatda 56 yoshli erkak hodisa joyida vafot etgan.
12. 17-may kuni Farg‘ona viloyatining Qo‘shtepa tumanida traktor tirkamasi qarovsiz qoldirilgan 3 yoshli bolani bosib ketgan. Oqibatda 3 yoshli bola hodisa joyida vafot etgan.
13. 17-may kuni Qashqadaryo viloyatining Chiroqchi tumanida ayol haydovchi boshqaruvidagi Matiz avtomobili ag‘darilib ketgan. Oqibatda mashinada yo‘lovchi sifatida ketayotgan 41 yoshli ayol voqea joyida vafot etgan. Haydovchi ayol va 3 nafar voyaga yetmagan bola shifoxonaga yotqizilgan.

YHXBB yana 4 ta YTH haqida ma’lumot bergan. Ularda odam o‘limi bilan bog‘liq holatlar kuzatilmagan.

1. 11-may kuni Andijon viloyatining Xo‘jaobod tumanida ikkita Damas to‘qnashishi oqibatida mashinalardan biri ag‘darilib ketgan. Ag‘darilgan Damas haydovchisi shifoxonaga yotqizilgan.
2. 13-may kuni Toshkent shahrining Yunusobod tumanida ikkita Spark to‘qnashishi oqibatida mashinalardan biri ag‘darilib ketgan. Hech kim tan jarohati olmagan.
3. 16-may kuni Namangan viloyatining Pop tumanida Isuzu yuk mashinasi beton to‘siqqa urilib, ag‘darilib ketgan. Haydovchi va ikki yo‘lovchi shifoxonaga yotqizilgan.
4. 16-may kuni Toshkent shahrining Mirzo Ulug‘bek tumanida boshqaruv vaqtida Nexia haydovchisi uxlab qolishi oqibatida mashina simyog‘ochga urilgan. Baxtli tasodif tufayli haydovchi tan jarohati olmagan.

Yuqoridagi YTHlar haqidagi xabarlar 12—18-may oralig‘ida berildi. Aslida yuz bergan YTHlar va odamlar o‘limi bundan ko‘proq bo‘lishi mumkin. Chunki YHXBB va Tergov departamenti ba’zi yo‘l-transport hodisalari haqidagi ma’lumotni keyinroq e’lon qilishi ham mumkin. Misol uchun, 1-mayda Navoiyda elektrik yigitning mashinalar orasida qisilib qolib halok bo‘lgani haqida 2 haftadan so‘ng ma’lum qilindi. Surxondaryoda 3-may kuni Captiva va traktor to‘qnashgani haqidagi xabar YTH oqibatida jabrlangan 13 yoshli bola 4 kundan so‘ng shifoxonada vafot etgach berilgan.

BMT koronavirus pandemiyasi sabab yo‘llarda sodir bo‘ladigan avariyalar oqibatida yuzaga keluvchi o‘lim holati 50-60 foizga kamayganini ma’lum qilgan.

Solishtirish uchun 15-martda O‘zbekistonda ilk koronavirus holati qayd etilganidan beri o‘tgan ikki oy ichida 13 ta o‘lim holati qayd etildi.