Бирлашган Араб Амирликларида коронавирус билан касалланиш ҳолатларининг умумий сони 25 мингтадан ошди. Бу ҳақда мамлакат Соғлиқни сақлаш вазирлиги маълумотига асосланиб, «РИА Новости» хабар берди.
Вазирлик ахборотига кўра, охирги бир сутка ичида 873 та янги касалланиш ҳолати аниқланган ва COVID-19’га чалинганлар сони 25 063 нафарга етган. Эпидемия бошланганидан бери 10 791 киши касалликдан тузалган, 227 нафар бемор унинг асоратлари оқибатида ҳаётдан кўз юмган.
Аввал БААда одамларнинг уйдан чиқишига қўйилган тақиқ бекор қилинган ва дезинфекция ишлари амалга оширилганидан кейин шаҳарларда жамоат транспортининг ҳаракатланишига рухсат берилганди. Шунингдек, БАА ҳукумати резидентлик визасига эга, мамлакатда қариндошлари қолган хорижликларнинг 1 июнгача амирликлар ҳудудига қайтишига ҳам изн берган.
Жаҳон соғлиқни сақлаш ташкилоти бутун дунёда COVID-19 коронавирус инфекциясининг тарқалишини 11 март куни пандемия даражасига чиққанини эълон қилган. Сўнгги маълумотларга кўра, жаҳонда коронавирусни юқтириб олганларнинг умумий сони 4,6 миллиондан ошди, 311 мингдан ортиқ одам вафот этди.
Изоҳ (0)