Сирдарёдаги сув тошқини оқибатида зарар кўрган ҳудудларда кўп қаватли уйларни қуриш ишлари билан учта компания шуғулланади. Бу ҳақда Халқаро пресс-клубнинг Сардоба воқеаларига бағишлаб ўтказилган сессиясида қурилиш вазирининг биринчи ўринбосари Шерзод Ҳидоятов маълум қилди..
Маълум қилинишича, «Шодлик» маҳалла фуқаролар йиғини олдида қурилаётган 20 та уйни Whitecity Construction компанияси қуради. Мазкур компания Тошкент шаҳар Чилонзор туманидаги Оқтепа мавзесида ҳамда Сергели туманида монолит уйлар қурган. Бундан ташқари, компания Тошкент шаҳридаги Талабалар шаҳарчасида ўқитувчилар учун уйлар қурган. Компаниянинг технологияси янги бўлгани учун унинг ходимлари, асосан, турклардан иборат.
Қурилиш ишларида иштирок этадиган иккинчи компания Ecopark компанияси бўлиб, у Тошкентдаги ТАПОиЧ ҳудудининг рўпарасидаги экоуйларни қурган, Тараққиёт кўчасидан янги кўприккача қурилиш ишларини олиб борган.
Учинчи компания эса Gold Step Invest компанияси ҳисобланади. Ушбу компания Тошкент шаҳри Қорасув даҳасида Миллий гвардия ходимлари учун уйлар қурган. Шунингдек, Ал-Хоразмий номидаги мактаб ҳам мазкур корхона томонидан қурилган.
Шерзод Ҳидоятовнинг айтишича, ана шу учта компания танлаб олиниб, уларга асосий шартлар қўйилган ҳамда тезлик билан замонавий, энергия тежовчи ва сифатли уйлар қуриш вазифаси берилган. Ҳозирги кунда лойиҳалаш ишлари билан параллел равишда компаниялар томонидан мобилизация ишлари бошлаб юборилган.
Эслатиб ўтамиз, 15 май куни Президент Шавкат Мирзиёев сардобаликлар билан учрашувда сув тошқини оқибатида зарар кўрган уйлар давлат томонидан бепул таъмирлаб берилишини, уйлари зарарланган одамларнинг илгариги ҳовлилари ҳам ўзларида қолишини маълум қилган эди. Маълумотларга кўра, Сирдарё вилоятидаги зарар етган хонадонларни таъмирлашга (1773 та уй) 123 миллиард сўм йўналтирилади, шунингдек, яна 3 та янги уй-жойлар даҳаси қурилади, унинг ичидан 1 та мактаб, 66 та уй, 1 та мактабгача таълим ташкилоти ҳамда битта қишлоқ оилавий поликлиникаси жой олади.
Мавзуга доир:Сирдарёда сув тошқинидан зарар кўрган 1,8 мингга яқин коттеж давлат ҳисобидан бепул таъмирланади
Эслатиб ўтамиз, Сардобадаги фалокатда салкам 6 мингта турар жойга зарар етган. Аввалроқ Сирдарё вилоятининг сув тошқинидан жабр кўрган ҳудудларида уйлар Ўзбекистоннинг вилоятлари кўмаги билан қурилиши ҳақида хабар берилган эди.
Изоҳ (0)