Россиянинг 46 нафар фуқароси бўлган Uzbekistan Airways самолёти 16 май куни Тошкентдан Ростов-Дон шаҳрига етиб борди. Бу ҳақда Ростовнинг «Платов» аэропорти вакили маълум қилди.
Қайд этилишича, самолёт қайтишида 260 нафар Ўзбекистон фуқаросини Тошкентга олиб келади. Аввалроқ 13 майга қадар 65 минг киши Россиядан Ўзбекистонга қайтиш истагини билдириб, чартер рейслар рўйхатига ёзилгани айтилганди.
ТИВ хорижий давлатларда бўлиб турган ва ватанга қайтиш истагини билдирган Ўзбекистон фуқароларининг рўйхати тузилаётгани ҳақида хабар берган эди. Президент Шавкат Мирзиёев 7 май кунги видеоселекторда хориждаги ватандошлар «имкониятга қараб, барибир олиб келиниши керак»лигини айтганди.
Шу муносабат билан 11 майдан 24 майига қадар Ўзбекистон фуқароларини хориждан олиб келиш бўйича 12 та чартер рейс амалга оширилиши белгиланганди, шундан 7 та рейс Россиядаги ўзбекистонликларни олиб келиш учун жалб этилади.
Чартер рейсларда энг аввал беморлар, ҳомиладор аёллар, кексалар ва ёш болалилар олиб келинади. Мазкур рейсларга чиқиш учун дипломатик ваколатхоналар ҳамда консуллик муассасаларда рўйхатдан ўтиш керак. Шундан сўнг у Uzbekistan Airways авиакомпаниясига тақдим этилади ва фуқаролар ушбу рўйхат асосида ҳаво кемаси бортига киритилади.
Ўзбекистонга қайтган барча фуқаролар 14 кундан кам бўлмаган муддатга карантин марказига жойлаштирилади.
Аввалроқ Россиянинг Самара вилоятида Қозоғистон чегарасидан бир неча ўн километр масофада бўлиб турган тахминан 800 нафар Ўзбекистон фуқароси Президент Шавкат Мирзиёевга мурожаат йўллагани ҳақида хабар берилганди. Ўзбекистон Ташқи ишлар вазирлиги улардан Республика махсус комиссиясининг қарорини кутишни сўраган.
Изоҳ (0)