2020 йилнинг 13 май куни «Effect.uz» сайти ходими Ғиёсбек Эшов Фарғона вилоятининг Қува туманида ҳужумга учрагани, мазкур ҳолат юзасидан тўрт нафар шахс гумонланувчи тариқасида ушланиб, жиноят иши очилгани ҳақида хабар берилган эди. Ички ишлар вазирлиги ҳузуридаги Тергов департаменти мазкур жиноят иши тафсилотларини тақдим этди.
Маълум қилинишича, 2020 йилнинг 13 май куни соат 18:30 да «Effect.uz» интернет нашри оператори Ғиёсбек Эшов хизмат юзасидан Matiz автомашинасида Қува туманидан Фарғона шаҳрига ҳаракатланиб, Андижон—Фарғона ва Қўшкечик—Бегат йўллари кесишган чорраҳада светофорнинг қизил чироғида тўхтаган вақтида унинг ёнига 38 ёшли У.И. бошқарувидаги Matiz келган.
У.И. бошқарувидаги Matiz’да унинг танишлари — 33 ёшли О.А., 24 ёшли М.Х. ва 21 ёшли С.Р. бўлган. Мазкур фуқаролар интернет-нашр операторининг кўзига номаълум мослама билан кўзни ёшлантирувчи суюқлик сепган ва Ғиёсбек Эшов бошқарувидаги Matiz’нинг орқа ойнасини уриб синдирган. Кейин эса улар Ғиёсбек Эшовга тегишли нархи 20 миллион сўм бўлган Canon 6D русумли видеокамерани қўлга киритиб, ҳаракатни давом эттирган.
Шундан сўнг Ғиёсбек Эшов видеокамерасини қайтариб олиш мақсадида автомашинасида уларнинг ортидан қувиб бориб, мазкур фуқароларнинг автомашинаси орқа қисмига урилган. Натижада уларнинг машинаси йўл четида жойлашган уйга урилиб тўхтаган. У.И., О.А., М.Х. ва С.Р. видеокамерани ўзлари билан олиб, автомашинадан тушиб, ҳодиса жойидан яширинган.
Олиб борилган терговга қадар текширув давомида Ғиёсбек Эшовга тегишли бўлган Canon 6D русумли видеокамера О.А. дан ашёвий далил тариқасида олинган.
Ҳолат юзасидан Қува туман ИИБ ҳузуридаги Тергов бўлими томонидан Ўзбекистон Республикаси Жиноят кодексининг 166-моддаси 2-қисми «в» (Талончилик) банди билан жиноят иши қўзғатилиб, О.А., М.Х. ва С.Р. лар процессуал тартибда ушланган.
Изоҳ (0)