Сурхондарёда 13 май куни соат 21:00 да ёғган кучли ёмғир туфайли вилоятнинг Олтинсой тумани ҳудудидан оқиб ўтувчи Олтинсой сойининг сув ҳажми сезиларли даражада ошди, деб хабар бермоқда ФВВ матбуот хизмати.
Мазкур ҳолат натижасида сув тошқини юзага келиши мумкинлиги сабабли вилоят Фавқулодда вазиятлар бошқармаси ҳамда Фавқулодда вазиятларда уларнинг олдини олиш ва ҳаракат қилиш давлат тизими (ФВДТ) куч ва воситалари ёрдамида ушбу ҳудудда истиқомат қилаётган 900 нафар фуқаро хавфсиз ҳудуд (яқин қариндошлари уйлари)га вақтинча кўчирилди.
Бундан ташқари, шу куни Бойсун туманидаги «Пасурхи» маҳалласига Бойсун тоғ тизмасига сурункали ёмғир ёғиши натижасида Ойбарак сойи орқали сел келган.
Шунингдек, туманнинг «Ҳунармандлар» маҳалласидан оқиб ўтувчи Авлод сойи орқали сел келиши оқибатида Авлод ҳамда Сариосиё қишлоқларини боғлаб турувчи кўприкни сув босгани туфайли автомобиллар ҳаракати вақтинча тўхтатилган.
Вазият вилоят Фавқулодда вазиятлар бошқармаси томонидан тўлиқ назоратга олинган. Айни дамда бошқарма қутқарувчилари ҳамда ФВДТнинг 150 дан ортиқ ходими, шунингдек, 20 га яқин техника ёрдамида сел оқибатларини бартараф этиш ишлари олиб борилмоқда.
Сел оқибатида жабрланган ва ҳалок бўлганлар тўғрисида маълумот келиб тушмаган.
Аввалроқ Зарафшондаги сел оқибатида камида 300 киши эвакуация қилингани ҳақида хабар берилган ва интернетда ушбу ҳодисанинг видеоси тарқалганди. Ҳодиса оқибатида дала майдонлари, хонадонлар ва бошқа объектларга қанча зиён етгани маълум қилинди.
Изоҳ (0)