Uzcard бренди остида фаолият олиб борувчи «Ягона умумреспублика процессинг маркази» масъулияти чекланган жамияти (МЧЖ) таъсисчилари таркиби янгиланди, дея хабар бермоқда Telegram’даги @bankers_uz канали.
Корхона ва ташкилотларнинг ягона давлат регистрида ҳавола қилинган маълумотларга кўра (МЧЖнинг СТИР рақами Очиқ маълумотлар порталида кўрсатилган), МЧЖнинг 75 фоиз улушига эгалик қилиш ҳуқуқи жисмоний шахс Маҳмудов Аҳрор Аброровичдан бошқа жисмоний шахс — Турсунов Ойбек Батирович тасарруфига ўтган.
Регистрда Uzcard’нинг қолган 25 фоизи улуши «Ягона умумреспублика процессинг маркази» МЧЖнинг ўзига тегишли экани кўрсатилган. «Юридик билимларимиз панд бермаётган бўлса, МЧЖнинг ўзига ўзи таъсисчи сифатида иштирок этиши қонунчилик бўйича ва мантиқан ҳам мумкин эмас», — деб ушбу ҳолатни изоҳлаган @bankers_uz.
Маълумот учун, Аҳрор Маҳмудов Uzcard’нинг амалдаги раҳбари ҳисобланади. Ойбек Ботирович Турсунов эса Президент Шавкат Мирзиёевнинг тўнғич куёвидир.
Аввалроқ 95 фоиз улуши Ойбек Турсуновга тегишли бўлган Promadik Invest компанияси «Капиталбанк» акцияларининг 36 фоизини сотиб олгани ҳақида хабар берилган эди.
Изоҳ (0)