4-may kuni soat taxminan 15:00 da Samarqand viloyatining Nurobod tumanidagi “Girdiqo‘rg‘on” va “Do‘stlik” mahallalari hududida kuchli jala quyishi natijasida sel kelgan. Oqibatda Samarqand—Qarshi yo‘lini suv bosdi, deya xabar beradi “Daryo” muxbiri.
Viloyat prokuraturasi axborot xizmatining “Daryo”ga ma’lum qilishicha, sel natijasida “Girdiqo‘rg‘on” mahallasidagi Jom ota qabristoni yonida joylashgan quvurga suv bilan oqib kelgan tog‘ toshlari tiqilib qolgan.
Qabristonning 50 kvadrat metr maydonini ham suv bosgan.
Bundan tashqari, Samarqand—Qarshi A-378 avtomobil yo‘lining “Do‘stlik” mahallasi hududidan o‘tuvchi 52-kilometrida joylashgan quvurga ham tog‘ toshlari tiqilib qolishi natijasida sel asfalt yo‘l ustidan o‘tgan.
Holat yuzasidan tuman Favqulodda vaziyatlar boshqarmasi, tuman prokurori va tuman IIB boshlig‘i va boshqa mutasaddi tashkilotlar bilan hamkorligida avtomagistral yo‘lining asfalt qoplamasidagi loyqa cho‘kindilar va quvurlar maxsus transport vositalari yordamida tozalanib, xavf bartaraf etildi.
