Коронавирусдан қорайиб кетган хитойлик шифокорнинг ранги тиниқлаша бошлади

Коронавирус сабабли тери ранги қорайиб кетган Ухань марказий касалхонаси шифокори Ю Фаннинг териси асл рангига қайтмоқда, деб хабар бермоқда The Sun.

Қайд этилишича, шифокор ўтган ҳафтада касалхонадан чиқарилган. 9 май куни тушган суратида унинг ранги сезиларли оқарганини кўриш мумкин.

The Sun’нинг ёзишича, шифокор коронавирусдан бутунлай соғайди, бироқ юришда бироз қийинчиликларга дуч келмоқда. Шунингдек, кечалари ёмон туш кўраётганидан шикоят қилган.

Тана ранги ўзгарган яна бир шифокор, Ху Вейфенг эса ҳали ҳам касалхонада даволанмоқда. Қайд этилишича, шифокор коронавирус билан олишаётганига 100 кундан ошди.

Эслатиб ўтамиз, апрель ойи охирларида коронавирусга чалинган хитойлик ушбу шифокорлар касалликнинг кутилмаган оқибатларига дуч келган эди. Уларда гормонлар билан боғлиқ муаммолар юзага келиб, бутун танаси қорайиб кетган. Бунга жигардаги бузилишлар сабаб бўлган.

Уларни даволаётган шифокор, ҳар иккала шифокорнинг тана ранги жигар тўлиқ тузалганидан кейин яхшиланишини билдирган.