Самарқанд вилоятидаги мактаб-интернатларда ишлаётган педагог кадрларни аттестациядан ўтказиш, малакасини ошириш ёки қайта тайёрловдан ўтказиш талаб даражасида ташкил этилмаганлиги боис 1-сонли махсус мактабда сўнгги 10 йилда ҳеч бир ўқитувчи аттестациядан ўтмаганлиги маълум бўлди. Бу ҳақда вилоят прокуратураси берган маълумотга таяниб, «Дарё» мухбири хабар берди.
Таъкидланишича, вилоятдаги 61-сонли мактаб-интернатда 5 нафар, 60-сонли мактаб-интернатда эса 21 нафар ўқитувчи, 33 нафар тарбиячи умуман малака оширмаган. 59-сонли мактаб-интернатда 30 нафар педагог ва 54 нафар тарбиячи малака ошириш курсларига бормаган. 60-сонли мактаб-интернатда 3 нафар ўқитувчи ва 15 нафар тарбиячи қайта тайёрлаш курсларини ўтамаган.
Вазирлар Маҳкамасининг 2011 йил 11 сентябрдаги қарори билан тасдиқланган низомга кўра, кўришда нуқсони бўлган болалар учун ихтисослаштирилган таълим муассасаларида кўзи ожиз ўқитувчилар жами педагог ходимлар сонининг 30 фоизидан ошмаган ва битта фандан дарс берувчи кўзи ожиз ўқитувчилар учун 50 фоиздан кўп бўлмаслиги белгиланган. Бироқ 59-сонли мактаб-интернатдаги 56 нафар олий маълумотли ўқитувчиларнинг 48 нафари ёки 85,7 фоизи кўзи ожиз ўқитувчилар ҳисобланади.
Низомга кўра, кўришда нуқсони бўлган болалар учун ихтисослаштирилган таълим муассасаларида кўзи ожиз ўқитувчилар она тили ва адабиёт, хорижий тиллар, тарих ва географиядан ташқари ижтимоий фанлардан, математика ва мусиқадан таълим бериши мумкинлиги кўрсатилган бўлса-да, география, биология, меҳнат таълими, информатика каби фанлардан ҳам кўзи ожиз ўқитувчилар дарс бериб келган.
Махсус мактаб интернатларда ўқувчилар сони ҳам белгиланган талабдан ортиб кетган. Заиф кўрувчилар учун ихтисослаштирилган мактабларда бошланғич синф ўқувчилари 10 нафар, юқори синфлар учун 12 нафарни ташкил этиши кўрсатилган бўлса-да, 60-сонли ихтисослашган мактаб-интернатнинг 2-«А» синфида 17 нафар, 2-«В» синфида 18 нафар, 3-«А» синфида 23 нафар, 3-«В» синфида 25 нафар, 5-«В» синфида 20 нафар, 6-«А» ва «В» синфларида 20 нафар ўқувчи таълим олаётганлиги аниқланган.
Изоҳ (0)