Навоийда 22 ёшли қизнинг маълумотларини ижтимоий тармоқларда тарқатиб юбориш орқали қўрқитиб, ундан пул талаб қилган фуқаро қўлга олинди. Бу ҳақда ИИВ ҳузуридаги Тергов департаменти ахборот хизмати хабар берди.
6 май куни соат 18:30 да вилоят ИИБ ва ДХХ ходимлари томонидан Навбаҳор туманида яшовчи 22 ёшли С.Ў.нинг аризаси асосида тезкор тадбир ўтказилган. Тадбир давомида 2018 йилдан ҳозирги кунга қадар С.Ў. билан яқин муносабатда бўлиб келган 27 ёшли Ф.Х. қўлга олинган.
Маълум бўлишича, фуқаро Ф.Х. қиз фош этилишини истамаган маълумотларни ижтимоий тармоқларга тарқатиб юбориш орқали уни қўрқитиб, 3 миллион сўм талаб қилган. Йигит пулларни олган вақтида ҳуқуқ-тартибот органлари ходимлари томонидан ушланган. Тадбир давомида 3 миллион сўм пул ашёвий далил сифатида расмийлаштирилиб олинган.
Ҳолат юзасидан Навбаҳор тумани ИИБ ҳузуридаги Тергов бўлими томонидан Жиноят кодексининг 165-моддаси 1-қисми (Товламачилик) билан жиноят иши қўзғатилган.
Аввалроқ Тошкентда 22 ёшли қизнинг эҳтиросли суратларини интернетга тарқатиш билан қўрқитиб, 800 доллар талаб қилган йигит ушлангани ҳақида хабар берилганди.
Изоҳ (0)