Samarqandda so‘nggi 10 yilda hech bir o‘qituvchisi attestatsiyadan o‘tmagan maktab borligi aniqlandi

Samarqand viloyatidagi maktab-internatlarda ishlayotgan pedagog kadrlarni attestatsiyadan o‘tkazish, malakasini oshirish yoki qayta tayyorlovdan o‘tkazish talab darajasida tashkil etilmaganligi bois 1-sonli maxsus maktabda so‘nggi 10 yilda hech bir o‘qituvchi attestatsiyadan o‘tmaganligi ma’lum bo‘ldi. Bu haqda viloyat prokuraturasi bergan ma’lumotga tayanib, “Daryo” muxbiri xabar berdi.

Ta’kidlanishicha, viloyatdagi 61-sonli maktab-internatda 5 nafar, 60-sonli maktab-internatda esa 21 nafar o‘qituvchi, 33 nafar tarbiyachi umuman malaka oshirmagan. 59-sonli maktab-internatda 30 nafar pedagog va 54 nafar tarbiyachi malaka oshirish kurslariga bormagan. 60-sonli maktab-internatda 3 nafar o‘qituvchi va 15 nafar tarbiyachi qayta tayyorlash kurslarini o‘tamagan.

Vazirlar Mahkamasining 2011-yil 11-sentabrdagi qarori bilan tasdiqlangan nizomga ko‘ra, ko‘rishda nuqsoni bo‘lgan bolalar uchun ixtisoslashtirilgan ta’lim muassasalarida ko‘zi ojiz o‘qituvchilar jami pedagog xodimlar sonining 30 foizidan oshmagan va bitta fandan dars beruvchi ko‘zi ojiz o‘qituvchilar uchun 50 foizdan ko‘p bo‘lmasligi belgilangan. Biroq 59-sonli maktab-internatdagi 56 nafar oliy ma’lumotli o‘qituvchilarning 48 nafari yoki 85,7 foizi ko‘zi ojiz o‘qituvchilar hisoblanadi.

Nizomga ko‘ra, ko‘rishda nuqsoni bo‘lgan bolalar uchun ixtisoslashtirilgan ta’lim muassasalarida ko‘zi ojiz o‘qituvchilar ona tili va adabiyot, xorijiy tillar, tarix va geografiyadan tashqari ijtimoiy fanlardan, matematika va musiqadan ta’lim berishi mumkinligi ko‘rsatilgan bo‘lsa-da, geografiya, biologiya, mehnat ta’limi, informatika kabi fanlardan ham ko‘zi ojiz o‘qituvchilar dars berib kelgan.

Maxsus maktab internatlarda o‘quvchilar soni ham belgilangan talabdan ortib ketgan. Zaif ko‘ruvchilar uchun ixtisoslashtirilgan maktablarda boshlang‘ich sinf o‘quvchilari 10 nafar, yuqori sinflar uchun 12 nafarni tashkil etishi ko‘rsatilgan bo‘lsa-da, 60-sonli ixtisoslashgan maktab-internatning 2-“A” sinfida 17 nafar, 2-“V” sinfida 18 nafar, 3-“A” sinfida 23 nafar, 3-“V” sinfida 25 nafar, 5-“V” sinfida 20 nafar, 6-“A” va “V” sinflarida 20 nafar o‘quvchi ta’lim olayotganligi aniqlangan.