Бухорода жорий йил 27 апрель куни бўлиб ўтган кучли шамол ва ёғингарчилик оқибатидаги талафот 141,6 миллиард сўмни ташкил қилмоқда. Бу ҳақда «Дарё»га вилояти ҳокимлиги ахборот хизмати раҳбари Олим Жўраев маълум қилди.
Бухоро ҳокимлигида тузилган штабга кўра, табиий офат натижасида вилоятнинг барча шаҳар ва туманларида 41 927 та бино ва иншоотга зарар етган бўлиб, иншоотларнинг 41 085 таси аҳоли хонадони, 842 таси эса ижтимоий соҳа объекти ҳисобланади.
Айни пайтгача 24 322 та хонадон, 326 та мактаб, 160 та мактабгача таълим ташкилоти, 81 та соғлиқни сақлаш ва 88 та бошқа муассасада таъмирлаш-тиклаш ишлари тўлиқ якунланган.
Талафот зарарини бартараф этиш мақсадида 32 530 нафар қурувчи жалб этилган. Автомобиль йўллари қўмитаси томонидан 16 та бекат тўлиқ таъмирланган.
Электр таъминотидан узилган 359,1 минг хонадоннинг 342,46 мингтаси қайта уланган ва тикланган. Ишдан чиққан 1,8 мингта трансформаторнинг 1,61 мингтаси қайта тикланган. «Ҳамза-1» ва «Ҳамза-2» насос станцияларида юқори кучланишли электр тармоқларини тиклаш ишлари якунига етказилган. Табиий газ тизими бўйича зарар етказилган 115,17 минг хонадоннинг барчасида газ таъминоти тўлиқ тикланган.
Вилоят тезкор штабининг «Дарё»га қўшимча қилишича, талафотлар ҳомийлик маблағлари эвазига босқичма-босқич бартараф этилади.
Эслатиб ўтамиз, 27 апрель кечаси Бухоро вилоятида, айниқса, Олот ва Қоракўл туманларида кузатилган ёмғир аралаш кучли шамол оқибатларини бартараф қилиш учун давлат бюджетидан 100 миллиард сўм ажратилгани хабар қилинганди.
Изоҳ (0)