Сурхондарё вилоятининг Шўрчи туманида 11 май куни 16:30 да Lacetti ва мотороллер иштирокида йўл-транспорт ҳодисаси содир бўлди. Бу ҳақда Тергов қўмитаси хабар бермоқда.
Ҳодиса «Оқкамар» маҳалласи ҳудудидан ўтувчи 4К-592 автомобиль йўлининг 6-километрида юз берган. 36 ёшли А.Р. бошқарувидаги Lacetti автомобили қарама-қарши йўналишга чиқиб кетиб, ушбу йўналишдан келаётган 38 ёшли К.А. бошқарувидаги мотороллер билан тўқнашиб ЙТҲ содир этган.
Оқибатда мотороллер ҳайдовчиси К.А. тан жароҳати олиб, ҳодиса жойида вафот этган.
Ҳолат юзасидан Шўрчи тумани ИИБ ҳузуридаги Тергов бўлими томонидан Жиноят кодексининг 266-моддаси 2-қисми (Одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ушбу модда бўйича айбдор деб топилган шахс 7 йилгача озодликдан маҳрум этилиши мумкин.
Эслатиб ўтамиз, 4К-592 автомобиль йўлида 27 апрель ва 8 май куни ҳам одам ўлими билан якунланган ЙТҲлар юз берганди.
Изоҳ (0)