Коронавирус пандемиясига қарши кураш туфайли бутун дунё бўйлаб ўн минглаб сил билан касалланганлар ташхиссиз ва даволашсиз қолмоқда. Бу келажакда ушбу касалликдан ўлим даражаси ортишига олиб келиши мумкин, деб ёзмоқда The Guardian бу борада ўтказилган тадқиқот натижаларига таяниб.
Қайд этилишича, тадқиқот Stop TB Partnership («Силни тўхтатинг») халқаро ташкилоти, Лондон империал коллежи ва Жонс Ҳопкинс университети билан ҳамкорликда ўтказилган. Ҳужжатда, асосан, сил касаллиги даражаси юқори бўлган уч мамлакат (Ҳиндистон, Кения ва Украина)дан олинган маълумотлардан фойдаланилган, кейин бутун дунё мисолида қаралган.
Оптимистик сценарийга кўра, 2025 йилга келиб дунёда силга чалинганлар сони 1,8 миллион кишига ошади, беморларнинг 342,5 минг нафари вафот этади. Пессимистик сценарийга кўра эса беш йилдан кейин 6,3 миллион киши сил билан касалланиши, 1,4 миллион киши ундан вафот этиши мумкин.
Ўз навбатида Stop TB Partnership’нинг ижрочи директори Лючики Дитиу сил касаллиги минг йиллар давомида инсоният билан бирга бўлиб келганини эслатиб ўтди. «Бизда 100 йилдан бери вакцина бор, яна 1-2 вакцина ишлаб чиқилмоқда. 2027 йилгача ярим миллиард кишини эмлаш зарур. Биз эса атиги 120 кунлик бўлган ва юзлаб вакциналар ишлаб чиқарилаётган касаллик (коронавирус — таҳририят изоҳи)ка ҳайрат билан қараяпмиз», — деган у.
Унинг таъкидлашича, COVID-19 вакцинасини ишлаб чиқишга диққатини жалб этган олимлар бошқа касалликларни унутиб қўймоқда. «Бизда силга қарши вакцина йўқ, ОИВга қарши вакцина йўқ, безгакка қарши ва бошқа касалликларга қарши вакцина йўқ. Сил улар орасида энг қадимийсидир», — дейди у.
The Guardian’нинг қайд этишича, ҳар йили 1,5 миллион киши сил касаллиги қурбони бўлмоқда. Бу бошқа инфекцион касалликларга қараганга энг юқори кўрсаткичдир. Бу касалликка қарши катталар учун вакцина ҳозирча йўқ, фақат болалар учун бор.
Эслатиб ўтамиз, айни пайтда дунё бўйлаб коронавирусга чалинганлар сони 4 миллион кишидан, қурбонлар сони 283 минг кишидан ошиб кетди.
Изоҳ (0)