Ғарбий Африканинг жанубида жойлашган Тема порт шаҳрида коронавирусга чалинган бир киши балиқни қайта ишлаш билан шуғулланувчи корхонанинг 533 ишчисига вирус юқтирди. «РИА Новости»нинг хабар беришича, бу ҳақда мамлакат президенти Нана Акуфа-Аддо маълум қилган.
«Таъкидлаш лозимки, чоршанбадан пайшанбага ўтар кечаси қайд этилган 921 та янги касалланиш ҳолатларининг 533 таси Темадаги балиқни қайта ишлаш билан шуғулланувчи корхона ишчиларидир. Барча 533 нафарини 1 киши зарарлаган», — деган давлат раҳбари халққа қарата мурожаатида. Мурожаат матни президент сайтида эълон қилинган.
Гана раҳбари оммавий тадбирларни тақиқлашни май ойи охиригача узайтирди ва таълим муассасаларининг ёпилишини айтди. У, шунингдек, зарур гигиена чораларига амал қилиш ва ижтимоий масофа сақлашни давом эттиришга чақирди.
Президент келтирган сўнгги маълумотларга кўра, Ганада умумий ҳисобда 4 700 киши коронавирусга чалинган, уларнинг 494 нафари соғайган, 22 нафари вафот этган.
Тиббиёт ходимлари коронавирусни аниқлаш бўйича 160 501 та тест ўтказган. Бу Африкада ўтказилган тест бўйича энг кўп кўрсаткичдир.
Гана президенти чекловлар аҳолининг ночор қатламини қийин аҳволга солиб қўйгани ва мамлакат иқтисодиётига салбий таъсир кўрсатгани туфайли 19 апрель куни мамлакат пойтахти Аккра ва йирик шаҳар бўлган Кумаси шаҳрида изоляция режимини бекор қилганди.
Изоҳ (0)