Россия коронавирусга чалинганлар сони бўйича дунёда учинчи ўринга кўтарилди. Мамлакатда 2 мингдан ортиқ одам COVID-19 қурбонига айланган

Россияда ўтган бир сутка ичида 11 656 кишида коронавирус инфекцияси аниқланди. Бу ҳақда тезкор штаб маълумотларида келтирилган.

Мамлакатда коронавирус билан касалланганларнинг жами сони 221 344 кишига етди. Россия ушбу кўрсаткич бўйича Италия ва Буюк Британияни ортда қолдириб, дунёда касаллар сони бўйича учинчи ўринга чиқиб олди.

Коронавирус билан касалланиш бўйича янги ҳолатлар асосан Москва (6169 киши), Москва вилояти (1079 киши), Санкт-Петербург (307 киши), Нижегород (291 киши), Смоленск (164 киши), Доғистонда (119 киши) қайд этилган. Пойтахт Москва шаҳрида коронавирус билан касалланганлар сони 115 909 кишига етган.

Ўтган бир сутка ичида 94 киши COVID-19 қурбонига айланган. Мамлакатда эпидемия бошланганидан буён жами 2009 киши коронавирус оқибатида вафот этган.

Россияда ҳозирга қадар коронавирусга чалинган беморларнинг 39 801 нафари даволанишга муваффақ бўлган (бир суткада — 5495 киши). Москва шаҳрида эса 4032 киши соғайган бўлиб, пойтахтдаги жами даволанишга муваффақ бўлганлар сони 17 822 кишига етди.

«Роспотребнадзор»нинг маълумотларига кўра, ўтган бир сутка ичида мамлакатда коронавирус бор-йўқлигини аниқлаш мақсадида 188 мингда тест олинган. Россияда COVID-19 тарқалиши бошлаганидан буён олинган тестлар сони 5,6 миллионга етди.

Аввалроқ россиялик вирусолог кунлар исиши билан COVID-19’нинг яна бир тўлқини кузатилишини тахмин қилган эди.