Қозоғистонда самолётга чиқишдан олдин COVID-19’га ПЗР таҳлил (Полимераза занжири реакцияси) топшириш мажбурияти тўғрисидаги талаб бекор қилинди. Бу ҳақда мамлакат бош санитар шифокори Садвакас Байгабуловга таяниб, Tengrinews хабар берди.
Байгабуловнинг маълум қилишича, 1 майдан 10 майга қадар учиб келган авиайўловчилар, аэропорт ходимлари ва самолёт экипажи аъзолари орасида ўтказилган мониторингга кўра, коронавирус билан касалланиш ҳолати қайд этилмаган.
«Шу муносабат билан 11 майдан бошлаб йўловчилар, аэропорт хизмати ходимлари ва экипаж аъзоларининг COVID-19’га ПЗР таҳлил топшириши тўғрисидаги талаб бекор қилинди», — дейди бош санитар. Таъкидланишича, бу борадаги тегишли қарор қабул қилиб бўлинган.
Санитар-карантин талаблари — ижтимоий масофаланиш, анкета тўлдириш, ниқоб режими, кузатувчиларни терминал биносига киритмаслик, контактсиз тана ҳароратини ўлчаш ва шу турдаги бошқа чекловлар ўз кучида қолади.
Юқори тана ҳарорати ёки касалликнинг бошқа белгилари аниқланган фуқаролар аэропорт биносига киритилмайди ва ўз навбатида ҳаво кемаси бортига чиқарилмайди. Ушбу авиайўловчилар изоляцияланади.
Маълумотларга кўра, бир нафар йўловчида COVID-19 таҳлил натижалари ижобий чиққани сабаб авиарейсга қўйилмаган.
Сўнгги маълумотларга кўра, Қозоғистонда коронавирусга чалинганлар сони 5126 кишига етган, 1941 бемор даволанишга муваффақ бўлган. COVID-19 оқибатида 31 киши вафот этган. Қозоғистонда фавқулодда ҳолат режими 11 майгача узайтирилган эди. 20 апрелдан бошлаб Нур-Султон ва Олмаотада карантин режими енгиллаштирилган, саноат корхоналари, қурилиш соҳаси ва айрим хизмат кўрсатиш тармоқлари ўз фаолиятини қайта йўлга қўйган.
Эслатиб ўтамиз, апрель ойининг охирларида Ўзбекистон Соғлиқни сақлаш вазирлиги ҳузуридаги Коронавирусга қарши кураш штаби аъзоси Ҳабибулла Оқилов келгусида хорижга чиқишда коронавирусга чалинмаганлик ҳақида маълумотнома берилмаслигини айтган эди.
Изоҳ (0)