Сурхондарё вилоятида 8 май куни Nexia автомобили дарахтга урилиши оқибатида йўловчи қурбон бўлди. Бу ҳақда ЙҲХББ хабар берди.
Йўл-транспорт ҳодисаси соат 13:00 ларда Шўрчи тумани «Оқкамар» маҳалласи ҳудудидан ўтувчи Олтинсой—Шўрчи йўналишидаги 4К-592 автомобиль йўлининг 8-километрида содир бўлган. 1998 йилда туғилган Ў.Қ. Nexia’ни ҳайдаб кетаётганда рул бошқарувини йўқотиб, йўлнинг ўнг четидаги дарахтга бориб урилган.
ЙТҲ оқибатида Nexia йўловчиси 1990 йилда туғилган А.Х. оғир тан жароҳати олиб, воқеа жойида вафот этган.
Мазкур ЙТҲ юзасидан Шўрчи туман ИИБ ҳузуридаги ТБ томонидан суриштирув ҳаракатлари олиб борилмоқда.
Шўрчидаги ЙТҲ ҳам ҳисобга олинса, жорий ҳафтада ЙҲХББ ва Тергов қўмитаси берган маълумотлар бўйича, автомобиллар иштирокидаги авариялар оқибатида вафот этганлар сони 11 нафарга етди.
4 май куни Самарқанднинг Ургут туманида «Жигули» ва юк машинаси тўқнашиши оқибатида 22 ёшли аёл ва унинг 2 ёшли боласи, Қашқадарёнинг Ғузор туманида Lacetti асфальт ётқизиш машинасига урилиши оқибатида 31 ёшли ҳайдовчи, 5 май куни Навоий вилоятининг Навоий шаҳрида Nexia-3 автомобили светофорнинг қизил чироғидан катта тезликда ўтиб, симёғочга урилиши оқибатида 26 ёшли ҳайдовчи, Сирдарёнинг Сайхунобод туманида Matiz каналга тушиб кетиши оқибатида 31 ёшли ҳайдовчи ҳамда унинг 30 ва 22 ёшли йўловчилари, Қорақалпоғистоннинг Беруний туманида Nexia автобусга урилиши оқибатида 48 ёшли ҳайдовчи, Қашқадарёнинг Касби туманида Cobalt юк машинасининг ортидан бориб урилиши оқибатида 53 ёшли ҳайдовчи, Жиззахда Cobalt ҳайдовчиси бошқарув вақтида ухлаб қолиши оқибатида 31 ёшли ҳайдовчи вафот этганди.
Мавзуга доир:Ўзбекистонда бир ҳафта ичида одам ўлими билан якунланган 7 та ЙТҲдан 5 таси Сурхондарёда содир бўлди
Изоҳ (0)