Қашқадарё вилоятида 7 май, пайшанба куни Cobalt ва «Камаз» юк машинаси иштирокида йўл-транспорт ҳодисаси содир бўлди. Бу ҳақда ЙҲХББ хабар берди.
Ҳодиса соат 18:30 лар атрофида Касби тумани ҳудудидан ўтган 4Р-90 Қарши—Бешкент—Касби—Косон автомобиль йўлининг 29-километрида юз берган. Cobalt автомобилини бошқариб кетаётган 1967 йилда туғилган Р.Р. ўзидан олдинда шу йўналишда чап томонга бурилаётган, 1989 йилда туғилган Ф.И. бошқарувидаги «Камаз 5511» юк машинасини қувиб ўтмоқчи бўлган. Аммо Cobalt «Камаз»нинг орқа чап томонига бориб урилган.
53 ёшли Р.Р. оғир тан жароҳати олиб, воқеа жойида вафот этган.
Мазкур ЙТҲ юзасидан Касби тумани ИИБ ТБ томонидан суриштирув ишлари олиб борилмоқда.
БМТ коронавирус сабаб йўлларда ўлим ҳолати икки бараварга камайганини маълум қилди. Аммо шу ҳафтанинг ўзида Ўзбекистонда одам ўлими билан якунланган бир нечта ЙТҲ содир бўлди. 4 май куни Самарқанднинг Ургут туманида «Жигули» ва юк машинаси тўқнашиши оқибатида 22 ёшли аёл ва унинг 2 ёшли боласи, Қашқадарёнинг Ғузор туманида Lacetti асфальт ётқизиш машинасига урилиши оқибатида 31 ёшли ҳайдовчи, 5 май куни Навоий вилоятининг Навоий шаҳрида Nexia-3 автомобили светофорнинг қизил чироғидан катта тезликда ўтиб, симёғочга урилиши оқибатида 26 ёшли ҳайдовчи, Сирдарёнинг Сайхунобод туманида Matiz каналга тушиб кетиши оқибатида 31 ёшли ҳайдовчи ҳамда унинг 30 ва 22 ёшли йўловчилари, Қорақалпоғистоннинг Беруний туманида Nexia автобусга урилиши оқибатида 48 ёшли ҳайдовчи вафот этганди.
Изоҳ (0)