Жиззах вилоятида 8 май куни Cobalt ҳайдовчиси рулда ухлаб қолиши оқибатида йўл-транспорт ҳодисаси содир бўлди. Бу ҳақда ЙҲХББ хабар берди.
Ҳодиса соат 09:00 ларда Ғаллаорол тумани ҳудудидан ўтувчи Тошкент—Термиз М-39 автомобиль йўлининг 1029-километрида юз берган. 1989 йилда туғилган Д.М. Cobalt автомобилини Тошкент—Самарқанд йўналиши бўйича бошқариб кетаётиб, чарчоқ сабабли рулда ухлаб қолиб, бошқарувни йўқотган. Оқибатда машина йўлдан чиқиб кетиб ағдарилган.
31 ёшли Д.М. оғир тан жароҳатлари олиб шифохонада вафот этган.
Мазкур ҳолат юзасидан Ғаллаорол тумани ИИБ ҳузуридаги ТБ томонидан суриштирув ишлари олиб борилмоқда.
Маълумот учун, Жиззахда бир ҳафта аввал ҳам ҳайдовчи рулда ухлаб қолиши оқибатида ЙТҲ юз берганди. 29 апрель куни Тошкент—Термиз М-39 автомобиль йўлида ҳаракатланаётган Matiz ҳайдовчиси ухлаб қолиши оқибатида машина ағдарилиб кетганди. Оқибатда 25 ёшли ҳайдовчи ва 13 ёшли йўловчи ҳалок бўлган. Машина салонида бўлган 4 киши эса шифохонага ётқизилганди.
БМТ коронавирус сабаб йўлларда ўлим ҳолати икки бараварга камайганини маълум қилди. Аммо шу ҳафтанинг ўзида Ўзбекистонда одам ўлими билан якунланган бир нечта ЙТҲ содир бўлди. 4 май куни Самарқанднинг Ургут туманида «Жигули» ва юк машинаси тўқнашиши оқибатида 22 ёшли аёл ва унинг 2 ёшли боласи, Қашқадарёнинг Ғузор туманида Lacetti асфальт ётқизиш машинасига урилиши оқибатида 31 ёшли ҳайдовчи, 5 май куни Навоий вилоятининг Навоий шаҳрида Nexia-3 автомобили светофорнинг қизил чироғидан катта тезликда ўтиб, симёғочга урилиши оқибатида 26 ёшли ҳайдовчи, Сирдарёнинг Сайхунобод туманида Matiz каналга тушиб кетиши оқибатида 31 ёшли ҳайдовчи ҳамда унинг 30 ва 22 ёшли йўловчилари, Қорақалпоғистоннинг Беруний туманида Nexia автобусга урилиши оқибатида 48 ёшли ҳайдовчи, Қашқадарёнинг Касби туманида Cobalt юк машинасининг ортидан бориб урилиши оқибатида 53 ёшли ҳайдовчи вафот этганди.
Изоҳ (0)