Қорақалпоғистоннинг Беруний туманида 7 май, пайшанба куни одам ўлими билан якунланган йўл-транспорт ҳодисаси содир бўлди. Бу ҳақда ЙҲХББ хабар бермоқда.
Ҳодиса соат 20:10 ларда «Олтинсой» МФЙ ҳудудидан ўтган ички автомобиль йўлида юз берган. 1972 йилда туғилган М.А. Nexia автомобилини катта тезликда бошқариб кетаётганда руль бошқарувини йўқотиб, қарама-қарши йўналишга чиқиб кетган. Nexia қарама-қарши йўналишда ҳаракатланиб келаётган ҳайдовчи 1990 йилда туғилган Ш.Н. бошқарувидаги Isuzu автобуси билан тўқнашган.
ЙТҲ оқибатида Nexia ҳайдовчиси 48 ёшли М.А. оғир тан жароҳати олиб воқеа жойида вафот этган. Ушбу автомашина йўловчилари М.У. ва Р.М. (иккаласи ҳам 1976 йилда туғилган) ҳамда Isuzu йўловчиси 1997 йилда туғилган М.Р. тан жароҳати олиб шифохонага ётқизилган.
Мазкур ЙТҲ юзасидан Беруний тумани ИИБ ТБ томонидан суриштирув ҳаракатлари олиб борилмоқда.
БМТ коронавирус сабаб йўлларда ўлим ҳолати икки бараварга камайганини маълум қилди. Аммо шу ҳафтанинг ўзида Ўзбекистонда одам ўлими билан якунланган бир нечта ЙТҲ содир бўлди. 4 май куни Самарқанднинг Ургут туманида «Жигули» ва юк машинаси тўқнашиши оқибатида 22 ёшли аёл ва унинг 2 ёшли боласи, Қашқадарёнинг Ғузор туманида Lacetti асфальт ётқизиш машинасига урилиши оқибатида 31 ёшли ҳайдовчи, 5 май куни Навоий вилоятининг Навоий шаҳрида Nexia-3 автомобили светофорнинг қизил чироғидан катта тезлик ўтиб симёғочга урилиши оқибатида 26 ёшли ҳайдовчи, Сирдарёнинг Сайхунобод туманида Matiz каналга тушиб кетиши оқибатида 31 ёшли ҳайдовчи ҳамда унинг 30 ва 22 ёшли йўловчилари вафот этганди.
Изоҳ (0)