АҚШда яшовчи беш ёшли бола бир неча кун аввал ўзига Lamborghini сотиб олиш учун ота-онасининг машинасини ҳайдаб кўчага чиққан эди. Уни полициячилар тўхтатиб, ота-онасига қайтарган эди. Полициячилар болага жазо ўрнига орзусини амалга оширишга ёрдам берди.
Motor’нинг ёзишича, бола ҳақиқий Lamborghini Huracan’да шаҳар айланган.
Юта штати полицияси болани тўхтатганидан бир кун ўтиб, унинг ота-онаси суперкарлар эгаларидан турли таклифлар олди. Автомобиллар эгалари боланинг орзусини амалга оширишга ёрдам бермоқчи бўлди.
Натижада боланинг ота-онаси қора Lamborghini Huracan эгаси Жереми Невеснинг таклифини қабул қилган.
Беш ёшли Адриан онаси билан суперкарда шаҳар айланган. Жереми бу ҳақда Facebook’даги саҳифасида ёзган.
Lamborghini Huracan 2014 йилда илк марта Женевадаги автосалонда тақдим этилган. Суперкарга 610 от кучига эга, 5,2 сиғимли V10 мотори ўрнатилган. Унинг тезлиги соатига 100 километрга етиши учун 3,2 секунд талаб қилинади. Автомобилнинг максимал тезлиги соатига 325 километрни ташкил этади.
Изоҳ (0)