Фарғона вилоятининг Қўқон шаҳрида карантин қоидаларини бузиб, ИИБ ходимларига қаршилик кўрсатган блогер 13 суткага қамалди. Бу ҳақда «Дарё»га Қўқон шаҳар маъмурий суди раиси Нодиржон Ҳожиматов маълум қилди.
Маълумот берилишича, ўзини блогер сифатида таништирган фуқаро Дилшод Далиев 2020 йил 1 май куни, тахминан, соат 17:50 ларда карантин қоидаларига зид равишда, узрли сабабларни исботловчи ҳолатларсиз Учкўприк туманида ўрнатилган вақтинчалик карантин постига таниши А.Р.га тегишли Nexia автомашинада йўловчи сифатида келган. Мазкур постда хизмат олиб бораётган ички ишлар ходимларидан постни олиб ташлаш ва автомашиналарни ўтказиб юборишни талаб қилган. Бақир-чақир қилиб, воқеани телефони орқали видео тасвирга олиб, уларнинг қонуний талабларига бўйсунмай постдан рухсатсиз ўтган. Шунингдек, фуқароларнинг тўпланишига ва автомашиналарнинг тирбандлиги юзага келишига сабабчи бўлган.
Мазкур ҳуқуқбузарлик ҳолати Қўқон шаҳар маъмурий суди томонидан кўриб чиқилган.
Фуқаро Дилшод Далиевнинг суд мажлисида тушунтириш беришича, кўзини кўрсатиш учун шифохонага кетаётган пайтда у ИИБ ходимлари олдига бориб, автомашинани ўтказиб юборишни сўраган. Аммо улар постдан автомашинани ўтказмасдан, бошқа йўлдан айланиб келишни тавсия қилган. Бундан жаҳли чиққан блогер уларнинг хатти-ҳаракатини телефони орқали видео тасвирга олиб, ижтимоий тармоқлардаги саҳифасига жойлаган. ИИБ ходимларига Қашқадарё ва Фарғона вилоятларида карантин ҳолати юмшатилгани ҳақида тегишли қарорлар чиқарилганини айтиб, бақир-чақир қилган. У банк соҳасида ишлаб, ишдан бўшатилганлиги учун блогерлик билан шуғулланаётганлигини маълум қилган.
Суд қарорига кўра, фуқаро Маъмурий жавобгарлик тўғрисидаги кодекснинг 183-моддаси (Майда безорилик) ва 194-моддасининг 1-қисми (Ички ишлар органлари ходимининг қонуний талабларини бажармаслик)да назарда тутилган ҳуқуқбузарликларни содир этганликда айбли деб топилиб, 13 суткага қамалган.
ИИБ ходимларининг хатти-ҳаракатларида ва ҳуқуқбузарнинг видео ёзувни ижтимоий тармоққа жойлаштириш ҳаракатида қонун бузилиш ҳолатлари бор-йўқлигини аниқлаш мақсадида Қўқон шаҳар прокурорига тақдимнома юборилган.
Изоҳ (0)