Андижон вилоятининг Асака туманидаги соатсозлик дўконидан 6,5 миллион сўмлик соат ҳамда телефон аксессуарларини ўғирлаган шахслар қўлга олинди. Бу ҳақда «Дарё»га вилоят ИИБ ахборот хизмати хабар берди.
Маълум бўлишича, 2020 йилнинг 26 апрель кунидан 27 апрелга ўтар кечаси Асака туманидаги «Камолот» маҳалласида яшовчи фуқаро Рўзивой Абдумаликовга қарашли соатсозлик дўконидан умумий нархи 6 миллион 521 минг сўмлик қўл соатлари ва телефон аксессуарлари ўғирланган.
Дўкон эгаси 28 апрель куни туман ИИБга ариза билан мурожаат қилиб, ҳолат ҳақида хабар берган. ИИБда ҳолат юзасидан Жиноят кодексининг 169-моддаси (Ўғирлик) 2-қисми «г» банди билан жиноят иши қўзғатилган.
ИИБ профилактика инспектори, катта лейтенант Машҳурбек Ҳакимов томонидан олиб борилган тезкор-суриштирув ишлари натижасида ушбу жиноятни Асака туманида яшовчи фуқаролар — П.Д, А.А. ҳамда С.О. содир этганлиги аниқланган.
Қайд этилишича, жиноятчилар ўғирланган буюмларни фуқаро У.С.га 200 минг сўм эвазига сотиб юборган. Фуқаро У.С.дан 36 дона уяли телефон мосламаси корпуси, 11 дона аккумулятор, 51 дона телефон ғилофи, 58 дона наушник, 29 дона қувватлагич ҳамда 33 дона USB кабель далилий ашё сифатида ҳужжатлаштириб олинган.
Мазкур ҳолат юзасидан ҳозирда дастлабки тергов ҳаракатлари олиб борилмоқда.
Изоҳ (0)