Коронавирусга чалинган британиялик эркак сепсис, юрак тўхташи, иккита инсультни ҳам бошидан кечирди ва омон қолди

Буюк Британияда коронавирусга чалинган 31 ёшли Омар Тэйлор бир қанча жиддий касалликларни енгиб ўтиб, шифохонадан чиқди, деб хабар беради Daily Mail.

Таъкидланишича, эркакнинг оиласига энг ёмонига тайёр туришни маслаҳат беришган: у медикаментоз комага туширилиб, бир ой ўпкани сунъий нафас олдириш аппаратига улаб қўйилган.

Тэйлор ўзига келганидан сўнг, ўнг қўлини сезмаган ва гапириш қобилиятини йўқотган. Аниқланишича, у иккита инсультни бошидан ўтказган. Бунга қадар эса унинг қони заҳарланган ва юраги тўхтаб қолган.

Тиббиёт ходимлари эркак бошқа ҳеч қачон юра олмаслигини тахмин қилган ва унинг соғайиб кетишини ҳақиқий мўъжиза демоқда.

«Мен икки ва тўрт ёшли фарзандларимга қараб, уларга отаси ўлганини қандай айтиш ҳақида ўйлардим», — дейди Тэйлорнинг рафиқаси.

Шунга қарамай, эркак соғайишга муваффақ бўлган. Тэйлор касалхонадан чиқаётганида шифокорлар уни қарсаклар билан кузатган. Ҳозирда эркакни  узоқ давом этадиган соғлиғини қайта тиклаш жараёнлари кутмоқда.