Украина Президенти Владимир Зеленский Грузиянинг собиқ президенти Михаил Саакашвилини президент қошидаги Миллий ислоҳотлар кенгаши таркибига кирувчи Ислоҳотлар ижроия қўмитаси раҳбари этиб тайинлади. Бу ҳақда президент матбуот хизмати берган хабарга таяниб, Meduza хабар берди.
Дастлаб Саакашвили бош вазирнинг ислоҳотлар бўйича ўринбосари бўлиши режалаштирилган. Саакашвилининг ўзи 22 апрель куни Владимир Зеленский унга Украина ҳукуматига қўшилиш учун мурожаат қилганини айтган. «Халқ хизматчиси» фракцияси Саакашвили номзодини ушбу лавозимга тавсия этиш учун депутатларнинг етарли даражадаги овозини тўплай олмагани сабабли Олий Рада унинг номзодини кўриб чиқмаган. Украина ҳукумати Саакашвилини ислоҳотлар бўйича бош вазир ўринбосарлигига номзод сифатида берган таклифини рад қилган.
Ислоҳотлар бўйича ижроия қўмитаси 2014 йилда ташкил этилган бўлиб, у Украина президенти ҳузуридаги маслаҳат органи ҳисобланади.
Михаил Саакашвили 2015—2016 йилларда Украинанинг Одесса вилояти маъмуриятини бошқарган. 2017 йилда ўша вақтдаги Украина президенти Пётр Порошенко билан низо туфайли Саакашвили мамлакат фуқаролигидан маҳрум қилинганди. 2019 йилда Владимир Зеленский Украина президентлиги учун сайловларда ғалаба қозонгач, Саакашвилига мамлакат фуқаролиги қайтариб берилди.
Изоҳ (0)