Владимир Путин АҚШнинг Россияга ўпкани сунъий нафас олдириш аппаратларини юбориш ҳақидаги таклифини қабул қилди. Reuters’нинг хабар беришича, бу ҳақда АҚШ президенти Дональд Трамп Техас губернатори Грег Эбботт билан учрашуви чоғида маълум қилган.
Трампнинг сўзларига кўра, бу таклиф Россияда коронавирус билан боғлиқ оғир вазият фонида билдирилган.
Аввалроқ 7 май куни икки мамлакат раҳбарлари телефон орқали суҳбатлашган ва коронавирус пандемияси билан боғлиқ вазиятни муҳокама қилган. Суҳбат чоғида Трамп Россияга тиббий асбоб-ускуналар партиясини етказиб беришни таклиф қилгани ҳақида Кремль хабар берган.
Апрель ойи бошларида Россия АҚШга коронавирусга қарши курашиш учун ижтимоий ёрдам юборган эди. Унда тиббий ҳимоя воситалари ва техникалар, шу жумладан, сунъий нафас олдириш аппаратлари ҳам бўлган. АҚШ давлат департаментининг расмий вакили Морган Ортеус юклар беминнат тарзда эмас, бозор нархида бўлмаган тўлов эвазига юборилганини айтган. Россия ТИВнинг расмий вакили Мария Захарова юк нархининг ярми Россия инвестиция фонди томонидан, қолган қисми эса Америка томонидан қопланганини билдирган.
16 апрелда АҚШ президенти Дональд Трамп Россияга ўпкани сунъий нафас олдириш ускуналарини етказиб беришда кўмак беришга тайёрлигини маълум қилган.
Жонс Ҳопкинс маълумотларига кўра, АҚШ коронавирус билан касалланганлар (1,25 млн) ҳамда вафот этганлар (75 минг) сони бўйича дунёда биринчи ўринда. Россия эса коронавирусга чалинганлар сони (177 минг) бўйича дунёда бешинчи, вафот этганлар сони (1625) бўйича эса йигирманчи ўринда.
Изоҳ (0)