Бухорода юз берган кучли шамол оқибатида қишлоқ хўжалигига қанча зарар етгани маълум қилинди

Ўзбекистон Қишлоқ хўжалиги вазирлиги Бухоро вилоятида 27 апрель куни юз берган кучли шамол оқибатида қишлоқ хўжалиги соҳасига қанча зарар етганини маълум қилди.

Вазирлик томонидан қайд этилишича, бош вазири ўринбосари Ўктам Барноев бошчилигидаги Қишлоқ хўжалиги вазирлиги ва бошқа вазирлик, идоралардан иборат республика ишчи гуруҳи Бухорода табиий офатдан зарар кўрган ҳудудларда зарурий чора-тадбирларни амалга оширмоқда.

Давлат раҳбарининг «Бухоро вилоятида юз берган табиий офат оқибатларини бартараф этиш бўйича кечиктириб бўлмайдиган чора-тадбирлар тўғрисида»ги фармойишига асосан, табиий офат натижасида қишлоқ хўжалиги ишлаб чиқаришида етказилган зарарлар, экин майдонларидаги йўқотишлар ва нобудгарчиликларни ўрнини қоплаш бўйича ишлар олиб борилмоқда.

Шунингдек, ирригация ва мелиорация тармоқлари тикланмоқда. Нобуд бўлган пахта ва ғалла майдонларини тўлиқ ўрганиб чиқиб, қисқа муддатларда бошқа турдаги маҳсулотларни экишни ташкил этиш бўйича чоралар кўрилмоқда. Зарар кўрган иссиқхоналарни тиклаш ва улардаги экинларни парваришлаш бўйича чоралар кўриш юзасидан вазифалар ижроси таъминланмоқда.

Олиб борилган ўрганишлар натижасига кўра, Бухоро вилоятида 2172 та фермер хўжалигида 9660 гектар боғ мавжуд бўлиб, ушбу майдонларда жорий йилда 115,8 минг тонна мева етиштириш белгиланган. Табиий офат натижасида боғларнинг 2616 гектари ёки 27,1 фоизига зарар етган. Йўқотилган ҳосил ўртача 19 721 тоннани ёки 17,03 фоизни ташкил қилган.

Вилоятдаги 115 та фермер хўжалиги ва қишлоқ хўжалик корхоналаридаги 253,5 гектар иссиқхона талафот кўрган.

Вилоятда 2020 йил ҳосили учун 97 900 гектар майдонга чигит экилган бўлиб, табиий офат натижасида 4554 гектар ёки 4,6 фоиз майдонга қайта чигит экилади.

Вилоят туманларида 18 143 та контурдаги 60 600 гектарда парвариш қилинаётган ғалла майдонларидан 12 619 гектари ёки 20,8 фоизи талафот кўрган.

Республика ишчи гуруҳи томонидан табиий офат натижасида қишлоқ хўжалиги экинлари, боғ ва токзорлар ва иссиқхоналарга етказилган зарарларни бартараф этиш ишлари олиб борилмоқда. Ғўза майдонларида қатқалоқни синдиришга оммавий сафарбарлик ҳамда култиваторларни отряд усулида ишлашини ташкил қилишга доир бир қатор амалий ишлар ҳам бажарилмоқда.