Андижонлик ёш тадбиркорлар «Саховат ва кўмак» умумхалқ ҳаракати доирасида 1200 та оилага 14 турдаги озиқ-овқат маҳсулотлари солинган саховат қутиларини етказиб берди. Бу ҳақда «Дарё» мухбири Умиджон Мамарасулов хабар бермоқда.
Ёшлар иттифоқи вилоят кенгаши ахборот хизмати раҳбари Жавоҳир Абубакировнинг маълумот беришича, «Ёшлар келажагимиз» жамғармаси ташаббуси ва ёш тадбиркорлар иштирокида вилоятда Ёш тадбиркорлар ассоциация ташкил этилган бўлиб, «Саховат ва кўмак» умумхалқ ҳаракати доирасида аҳолининг ижтимоий ҳимояга муҳтож қатламини қўллаб-қувватлашга ҳаракат қилмоқда. Шунингдек, ассоциацияга аъзо тадбиркорлар имкониятидан келиб чиқиб, 10 тадан 100 тагача оилани қарамоғига олмоқда.
Шу кунга қадар ассоциация аъзоларининг 30 нафари 1200 та эҳтиёжманд оилага 14 турдаги озиқ-овқат маҳсулотлари, тиббиёт ниқоблари ва антисептик воситалар жамланган саховат қутилари жойланган ҳомийлик хайрияларини юборган.
Ёш тадбиркорлар, шунингдек, «Меҳр-шафқат ва саломатлик» фондига 21 миллион сўм, «Саховат ва кўмак» умумхалқ ҳаракатига эса 67 миллион сўмдан ортиқ маблағ хайрия қилган.
Изоҳ (0)