Самарқанд вилоятида коронавирус инфекциясига чалинган 17 нафар бемор бутунлай соғайди ва 8 май куни реабилитацияга кузатилди. Бу ҳақда Соғлиқни сақлаш вазирлиги хабар берди.
Тузалганларнинг барчаси Самарқанд вилоятидан бўлиб, коронавирус инфекциясига чалинганлар билан мулоқотда бўлиб, касалликни юқтириб олган. Уларнинг 10 нафари эркак, 7 нафари аёл. Соғайганлар орасида энг каттаси 52 ёшда бўлса, энг кичиги 2019 йил туғилган чақалоқ.
Самарқанд вилоятида шу пайтга қадар коронавирусдан соғайганлар сони 69 нафарга етди. Ўзбекистонда айни пайтга қадар коронавирус инфекциясидан соғайганлар сони 1738 нафарни ташкил этмоқда.
Ўзбекистонда 8 май соат 15:00 ҳолатига кўра коронавирусга чалинганлар сони 10 нафарга кўпайиб, 2 324 нафарга етди. Ўзбекистонда коронавирус инфекцияси билан касалланиш илк бор қайд этилган 15 мартдан буён касаллик оқибатида 10 нафар бемор вафот этган.
Касалланиш ҳолатлари сони нисбатан камайиб, эпидемиологик вазият барқарорлашиб бораётгани муносабати билан, Ўзбекистон ҳукумати карантин чораларини юмшатишга қарор қилган, мамлакат «қизил», «сариқ» ва «яшил» ҳудудларга ажратилган.
Изоҳ (0)